बालदिनानिमित्त १४ नोव्हेंबर रोजी कांदिवलीत सहाव्या प्रल्हाद नलावडे स्मृती चषक शालेय कॅरम स्पर्धेचे आयोजन करण्यात आले आहे. १४ वर्षांखालील वयोगटातील ही स्पर्धा विनाशुल्क असून राज्यभरातील ६४ शालेय खेळाडू त्यात सहभागी होणार आहेत. आयडियल स्पोर्ट्स अकॅडमी, शशिकलाई फाउंडेशन आणि कॅरमप्रेमी अविनाश नलावडे यांच्या संयुक्त विद्यमाने ही स्पर्धा होत आहे. कांदिवली पश्चिमेतील साईनगर भागातील मुंबई पब्लिक स्कूलच्या सभागृहात सिंको प्लॅटिनम चॅम्पियन कॅरम बोर्डवर सामने खेळवले जाणार आहेत.
नामवंत खेळाडूंचा सहभाग
स्पर्धेची सुरुवात मुंबई महापौर चषक शालेय कॅरम स्पर्धेतील विजेता केवल कुळकर्णी आणि बीएमसी-मुंबई पब्लिक स्कूल कांदिवलीचा सार्थक सिंग यांच्यातील लढतीने होणार आहे. उद्घाटनाला मुख्याध्यापक संदीपान घुले, अविनाश नलावडे, शशिकलाई फाउंडेशनचे प्रमुख रामेश्वर लोहे, क्रीडापटू गोविंदराव मोहिते आणि शिवछत्रपती पुरस्कार विजेते लीलाधर चव्हाण उपस्थित राहणार आहेत. आयडियल शालेय कॅरम स्पर्धेचा विक्रमी विजेता पोद्दार अकॅडमी-मालाडचा प्रसन्न गोळे, एसकेकेई मुलुंडचा केवल कुळकर्णी, आरपीडी सावंतवाडीचा भरत सावंत, संकल्प व्हॅली-पुणेचा हर्षित शिंदे आणि विश्वनाथ विद्यालय-राजापूरची निधी सप्रे यांच्याकडून चांगल्या कामगिरीची अपेक्षा आहे. याशिवाय नक्ष वैती, अनय म्हेत्रे, शिवांश मोरे, दुर्वेश चव्हाण, विहा राणे, गौरी सावंत आणि आरव आंजर्लेकर हे खेळाडूही विजेतेपदासाठी आपले कौशल्य पणाला लावणार आहेत.
पहिल्या १६ खेळाडूंना पुरस्कार
शालेय खेळाडूंचा वाढता प्रतिसाद लक्षात घेऊन यंदा पुरस्कारांची संख्या वाढवण्यात आली आहे. स्पर्धेतील पहिल्या १६ विजेत्या व उपविजेत्या खेळाडूंना स्ट्रायकरसह पुरस्कार देऊन गौरवण्यात येणार आहे. त्यामुळे बालदिनाच्या निमित्ताने होणाऱ्या या स्पर्धेत चुरशीच्या लढती पाहायला मिळणार आहेत. खेळाडूंना प्रोत्साहन देण्यासाठी कॅरमप्रेमींनी मोठ्या संख्येने उपस्थित राहावे, असे आवाहन आयोजकांनी केले आहे.
स्रोत: मूळ बातमी
Leave a Reply