राष्ट्रवादी काँग्रेसमध्ये पुन्हा एकदा राजकीय घडामोडींना वेग आला आहे. अजित पवार गटातील २० ते २२ आमदार पक्ष सोडण्याच्या तयारीत असल्याचा दावा खासदार संजय राऊत यांनी केला होता. त्यांच्या या विधानानंतर राष्ट्रवादीच्या राजकीय वर्तुळात चर्चांना उधाण आले. त्यातच उपमुख्यमंत्री सुनेत्रा पवार यांच्यासोबत राष्ट्रवादीच्या नेत्यांची बैठक झाली. या बैठकीनंतर आमदार सुनील शेळके यांनी माध्यमांशी बोलताना संजय राऊतांच्या दाव्याला जोरदार प्रत्युत्तर दिले.
शिवसेना ठाकरे गटाचे खासदार संजय राऊत यांनी सुनेत्रा पवार यांच्या नेतृत्वाखालील राष्ट्रवादीचे २० ते २२ आमदार पक्ष सोडू शकतात, असा दावा केला होता. हे आमदार शरद पवार यांच्या संपर्कात असल्याचेही त्यांनी म्हटले होते. त्यानंतर सुनेत्रा पवार यांच्या कार्यालयातून आमदारांशी संपर्क साधला जात असल्याची माहिती समोर आली होती.
शेळकेंचा खुलासा: आम्हाला कोणाचाही फोन नाही
या सगळ्या चर्चांवर सुनील शेळके यांनी स्पष्ट भूमिका मांडली. ते म्हणाले, आमचे कोणतेही आमदार कुणाच्याही संपर्कात नाहीत. शरद पवार किंवा त्यांच्या पक्षातील कोणत्याही नेत्याचा आम्हाला फोन आलेला नाही. संजय राऊत कधीपासून भविष्यवाणी करायला लागले, हेच मला समजत नाही, असा टोला त्यांनी लगावला.
आम्ही महायुतीच्या नेत्यांना भेटतो, यात गैर काय? असा सवालही शेळके यांनी केला. राष्ट्रवादीचे आमदार एकसंघ असून पक्षात फूट पडणार असल्याच्या चर्चा निराधार असल्याची भूमिका त्यांनी मांडली.
सुनेत्रा पवार यांच्या पाठीशी सर्व आमदार
बैठकीबाबत बोलताना शेळके यांनी सांगितले की, सुनेत्रा पवार यांच्या नेतृत्वावर सर्व आमदारांचा विश्वास आहे. सुनील तटकरे, प्रफुल्ल पटेल आणि सुनेत्रा पवार हे सर्व नेते एकत्र आहेत. अजित पवार यांच्यानंतर त्यांचे उत्तराधिकारी म्हणून आम्ही सुनेत्रा पवार यांच्याकडे पाहतो, असेही ते म्हणाले.
आजच्या बैठकीत दोन्ही राष्ट्रवादी काँग्रेसच्या विलिनीकरणाचा कोणताही विषय नव्हता, असे शेळके यांनी स्पष्ट केले. मागील आठवड्यात देवगिरी बंगल्यावर झालेल्या बैठकीत आमदारांनी आपापल्या मतदारसंघातील अडचणी आणि इतर विषय मांडले होते. एकंदरीत, संजय राऊत यांच्या दाव्यानंतर राष्ट्रवादीच्या आमदारांनी एकजुटीची भूमिका मांडली आहे. आता या राजकीय घडामोडींवर सुनेत्रा पवार आणि पक्षातील वरिष्ठ नेते पुढे काय भूमिका घेतात, याकडे सर्वांचे लक्ष लागले आहे.
Leave a Reply