नाशिक : दिवाळीच्या काळात परदेशात राहणाऱ्या आपल्या माणसांपर्यंत घरचा फराळ पोहोचवण्याची परंपरा यंदाही जोरात सुरू आहे. जुन्या नाशिकमधील जीपीओ टपाल कार्यालयातून गेल्या वीस दिवसांत शेकडो फराळाची पार्सल देश-विदेशात पाठवण्यात आली असून, त्यातून कार्यालयाला सुमारे आठ लाख रुपयांचे उत्पन्न मिळाले आहे. पार्सल पाठवण्याचा ओघ अजूनही सुरूच असल्याचे अधिकाऱ्यांनी सांगितले.
शिक्षण आणि नोकरीच्या निमित्ताने शहरातील अनेक जण देशात तसेच परदेशात वास्तव्याला आहेत. दिवाळीसारख्या सणाला घरी येणे त्यांना शक्य होत नाही. अशा वेळी कुटुंबीय टपाल विभागाच्या पार्सल सेवेच्या माध्यमातून घरचा फराळ त्यांच्यापर्यंत पोहोचवतात. त्यामुळे सणाच्या दिवशी कुटुंबाचा सहवास लाभला नसला तरी घरच्या फराळाचा आस्वाद घेता येतो. यंदाही हीच परंपरा कायम राहिली असून, शेकडो पार्सल टपाल कार्यालयाच्या माध्यमातून विविध देशांमध्ये पोहोचली आहेत.
वीस दिवसांत १२९ पार्सल, ७ लाख ८९ हजारांचा महसूल
२३ ऑक्टोबर ते १२ नोव्हेंबर या कालावधीत जीपीओ टपाल कार्यालयाच्या माध्यमातून जगाच्या विविध देशांमध्ये १२९ पार्सल पाठवण्यात आली. त्यातून कार्यालयाला ७ लाख ८९ हजार ३८० रुपयांचा महसूल प्राप्त झाला. गुरुवारीही चार ग्राहकांनी फराळाचे पार्सल परदेशात पाठवण्यासाठी बुक केल्याची माहिती अधिकाऱ्यांनी दिली. पार्सल करणाऱ्यांचा ओघ अजूनही सुरू असल्याने कार्यालयाच्या तिजोरीत आणखी भर पडण्याची शक्यता आहे.
जर्मनी आणि ग्रेट ब्रिटनमध्ये सर्वाधिक पार्सल
दरवर्षी अमेरिका आणि ऑस्ट्रेलिया या देशांमध्ये दिवाळी फराळाची सर्वाधिक पार्सल पोहोचत असतात. यंदा मात्र अमेरिकेत काही वस्तू पाठवण्यावर असलेल्या बंदीमुळे जर्मनी आणि ग्रेट ब्रिटनमध्ये सर्वाधिक पार्सल पाठवण्यात आल्याची माहिती टपाल कार्यालयाने दिली आहे. टपाल कार्यालयाच्या माध्यमातून पोहोच झालेला दिवाळी फराळ देश-विदेशातील बांधवांना घरच्या आठवणींचा आस्वाद देत आहे.
स्रोत: मूळ बातमी
Leave a Reply