जळगाव शहरात डेंगीसदृश लक्षणे असलेले तीन रुग्ण आढळून आले आहेत. निमखेडी, दादावाडी आणि नशेमन कॉलनी या तीन भागांत हे संशयित रुग्ण आढळले आहेत. त्यामुळे महापालिकेच्या आरोग्य विभागाची यंत्रणा सतर्क झाली असून मलेरिया विभागाने प्रतिबंधात्मक उपाययोजनांना वेग दिला आहे.
फवारणी आणि धूरफवारणीला वेग
डासांची उत्पत्ती रोखण्यासाठी संबंधित परिसरात धूरफवारणी, ॲबेटिंग आणि औषध फवारणीचे काम तीव्र स्वरूपात सुरू करण्यात आले आहे. डेंगी आणि मलेरियाचा संभाव्य धोका टाळण्यासाठी डास उत्पत्तीची ठिकाणे शोधणे, साचलेल्या पाण्यावर ॲबेटिंग करणे, औषध फवारणी आणि धूरफवारणी अशा उपाययोजना केल्या जात आहेत. डेंगीसदृश रुग्ण आढळलेल्या भागांवर विशेष लक्ष केंद्रित करण्यात आले आहे.
दिवाळीच्या सणानिमित्त नागरिक उत्सवाच्या आनंदात असताना शहरातील सार्वजनिक आरोग्याची जबाबदारी महापालिकेच्या आरोग्य विभागातील कर्मचारी पार पाडत आहेत.
सांडपाण्याचा त्रास
शहरातील अनेक भाग हे नवीन विस्तारित असून येथे अद्याप गटारी झालेल्या नाहीत. त्यामुळे सांडपाणी मोकळ्या जागांमध्ये साचत असल्याने डासांची उत्पत्ती वाढत आहे. त्यावर उपाययोजना करण्याची मागणी नागरिकांकडून होत आहे.
स्रोत: मूळ बातमी
Leave a Reply