मावळ तालुक्यातील ठोकळवाडी धरणातील पाण्यावर स्थानिक धरणग्रस्त शेतकऱ्यांचा हक्क असल्याचे सांगत, त्यांच्या प्रश्नांची सोडवणूक झाल्याशिवाय पाणी अन्यत्र वळवण्याचा निर्णय घेऊ नये, अशी मागणी धरणग्रस्त शेतकऱ्यांनी केली आहे. पाण्याबाबत कोणताही निर्णय घेताना शेतकऱ्यांना विश्वासात घ्यावे आणि त्यांच्या मागण्यांबाबत शासनाने सकारात्मक भूमिका घ्यावी, असे आवाहनही त्यांनी केले आहे.
पिंपरी चिंचवडला पाणीपुरवठ्याच्या प्रस्तावाला विरोध
ठोकळवाडी धरणातून पिंपरी चिंचवड शहराला पाणीपुरवठा करण्याच्या नियोजित प्रस्तावाला धरणग्रस्त शेतकऱ्यांनी कृती समितीच्या बैठकीत विरोध दर्शवला. ही बैठक घाटेवाडी येथे झाली. मावळ पंचायत समितीचे माजी सभापती शंकरराव सुपे आणि जिल्हा परिषद सदस्य अनंता पावशे यांच्या मार्गदर्शनाखाली ही बैठक पार पडली. बैठकीला शिवसेना जिल्हाप्रमुख राजेश खांडभोर, नारायणराव ठाकर, शांताराम बापू लष्करी, नामदेव शेलार, भरत जोरी, विठ्ठल वाडेकर आदी उपस्थित होते.
जमिनी दिल्या, तरी पाण्यासाठी संघर्ष
शेतीसाठी पाणी मिळावे म्हणून धरणग्रस्तांना आंदोलने करावी लागली, ही वस्तुस्थिती बैठकीत मांडण्यात आली. ज्या शेतकऱ्यांनी कवडीमोल भावाने आपल्या जमिनी दिल्या, त्यांनाच पाण्यासाठी संघर्ष करावा लागत असल्याकडे लक्ष वेधण्यात आले. कान्हे फाटा-वडेश्वर रस्त्यावरील खासगी कंपनीची मालकी काढून हा रस्ता सार्वजनिक बांधकाम विभागाकडे वर्ग करण्यासाठीही सरकार दरबारी अनेक वर्षे पाठपुरावा करावा लागत असल्याचा मुद्दा बैठकीत उपस्थित करण्यात आला.
धरणग्रस्तांच्या शेतीच्या पाण्याचा प्रश्न आणि विविध प्रलंबित मागण्यांची पूर्तता झालेली नसताना ठोकळवाडी धरणातील पाणी पिंपरी चिंचवड शहराला देण्याचा प्रस्ताव अन्यायकारक असल्याची भावना बैठकीत व्यक्त करण्यात आली. यावेळी नव्याने ठोकळवाडी धरणग्रस्त शेतकरी कृती समितीची रचना करण्यात आली.
स्रोत: मूळ बातमी
Leave a Reply