मुंबईतून एकही आंतरराष्ट्रीय उड्डाण नवी मुंबई विमानतळाकडे हलवू नका, असे पत्र मुख्यमंत्री देवेंद्र फडणवीस यांनी केंद्रीय नागरी वाहतूक मंत्रालयाला लिहिले आहे. आंतरराष्ट्रीय विमानतळ नवी मुंबईला न हलवण्याची भूमिका घेतल्याबद्दल ठाकरे गटाचे नेते संजय राऊत यांनी मुख्यमंत्र्यांचे आभार मानले आहेत. ही भूमिका घेतल्याबद्दल मी राज्याच्या मुख्यमंत्र्यांचे अभिनंदन करतो, असे संजय राऊत यांनी माध्यमांशी संवाद साधताना म्हटले आहे. नवी मुंबई विमानतळ अत्यंत अनावश्यक असल्याचेही त्यांनी सांगितले.
नवी मुंबई विमानतळाबाबत राऊत यांची भूमिका
नवी मुंबई विमानतळाची उभारणी ज्या पद्धतीने झाली ती आंतरराष्ट्रीय दर्जाची नाही, असे राऊत म्हणाले. त्याची रचनाही धोकादायक आहे, असे त्यांचे म्हणणे आहे. मुंबईच्या बाहेर आंतरराष्ट्रीय विमानतळ नेणे हे मुंबईचे महत्त्व कमी करण्यासारखे आहे. आंतरराष्ट्रीय विमानतळ गावाबाहेर असणे योग्य नाही, असे ते म्हणाले. कुणाला तरी विमानतळाची जमीन हडप करायची आहे, कुणाचा तरी त्यावर डोळा आहे, म्हणून ते करणे योग्य नव्हते, असेही राऊत म्हणाले. एकेकाळी फडणवीसही नवी मुंबईच्या आंतरराष्ट्रीय विमानतळाचे कौतुक करत होते, असे संजय राऊत यांनी सांगितले.
अरब राष्ट्रांतील म्हणजे गल्फच्या बहुतेक विमान कंपन्यांनी नवी मुंबईत लँडिंग करण्यास नकार दिला आहे. युरोपच्या विमान कंपन्यांनीही लँडिंगला विरोध केला आहे. सुरक्षेच्या दृष्टीने विमानतळ धोकादायक असल्याचे त्यांचे म्हणणे आहे. या विमानतळासाठी जमिनी गेल्या. घरंदारं गेली. पर्यावरणाचा ऱ्हास झाला. मग हा खटाटोप कुणाच्या मूर्खपणामुळे झाला हे बाहेर आले पाहिजे, अशी मागणी राऊत यांनी केली.
मुंबईचे विमानतळ मुंबईतच हवे, पुनर्वसनाची मागणी
मुंबईचे विमानतळ मुंबईतच हवे. त्यात सुधारणा करता येऊ शकते, असे राऊत म्हणाले. मुंबईच्या विमानतळाच्या परिसरात झोपड्यांचे जंगल झाले आहे. झोपड्या वाढल्या आहेत. त्यांचे योग्य पद्धतीने पुनर्वसन करा आणि तो भाग विमानतळासाठी वाढवा, अशी मागणी त्यांनी केली. अख्खे विमानतळ उचलून नवी मुंबईत नेता, असा सवालही त्यांनी केला. मी दोनदा नवी मुंबई विमानतळावर जाण्याचा प्रयत्न केला. प्रचंड दमलो, थकलो, असेही त्यांनी सांगितले.
आंतरराष्ट्रीय विमानतळावर जो उत्साह लागतो तो नवी मुंबईत दिसत नाही, असे राऊत म्हणाले. तिथे देशांतर्गत विमानेही उतरवू नयेत, असे त्यांचे म्हणणे आहे. आंतरराष्ट्रीय प्रवाशांचे प्राण महत्त्वाचे आणि देशांतर्गत प्रवाशांचे महत्त्वाचे नाहीत का, असा सवाल त्यांनी केला. विमानतळावर भूमिगत मेट्रोतून मुख्य शहरात येता येते. दिल्लीत अशी सुविधा आहे. नवी मुंबईत तशी सुविधाही नाही. तिथे बसेस नाहीत, टॅक्सी नाहीत. कंटेनर धूळ खात पडले आहेत. त्यातूनच मार्ग काढून जावे लागते. याला आंतरराष्ट्रीय विमानतळ म्हणत नाहीत, असे ते म्हणाले. मुख्यमंत्र्यांना सुबुद्धी सूचली त्याबद्दल मी ईश्वराचे आभार मानतो, असेही ते म्हणाले. अदानी हे महाराष्ट्राचे मुख्यमंत्री नाहीत. देशाचे पंतप्रधान नाहीत. आम्हाला महाराष्ट्राचा इंटरेस्ट जपला पाहिजे. महाराष्ट्राच्या उद्योग आणि गुंतवणूकदारांचा इंटरेस्ट जपला पाहिजे, असे त्यांनी सांगितले.
स्रोत: मूळ बातमी
Leave a Reply