नाशिक : नाशिक शहरातील बडदे नगर येथील उदयोन्मुख स्केटिंगपटू आराध्या शर्मा हिने आपल्या उत्कृष्ट क्रीडाकौशल्याच्या जोरावर राज्यस्तरावर उल्लेखनीय यश संपादन केले आहे. मुंबई येथे आयोजित करण्यात आलेल्या आरएसएफआय राज्य अजिंक्यपद स्पर्धा २०२६ (RSFI State Championship 2026) मध्ये आराध्याने सुवर्णपदक पटकावत नाशिकच्या शिरपेचात मानाचा तुरा रोवला आहे.
या स्पर्धेत ५००० मीटर पॉइंट टू पॉइंट रिंक रेस या प्रकारात आराध्याने उत्कृष्ट वेग, अचूक तंत्र, जिद्द आणि आत्मविश्वासाच्या जोरावर प्रतिस्पर्ध्यांवर मात करत प्रथम क्रमांक मिळवला. तिच्या या कामगिरीमुळे पीएसए संस्थेच्या शिरपेचातही मानाचा तुरा रोवला गेला आहे.
स्केटिंग असोसिएशन ऑफ महाराष्ट्र यांच्या वतीने विरार येथे झालेल्या ३६ व्या महाराष्ट्र रोलर स्केटिंग चॅम्पियनशिप स्पर्धेत नाशिकच्या परमानंद स्पोर्ट्स अकॅडमी येथील आराध्या शर्मा हिने १२ ते १५ या वयोगटात ५००० मीटर पॉइंट टू पॉइंट रिंक रेस या प्रकारात सुवर्णपदकाची कमाई केली. आराध्या शर्मा ही स्केटिंगचा नियमित सराव परमानंद स्पोर्ट्स अकॅडमी येथे करते. परमानंद स्पोर्ट्स अकॅडमीचे संचालक योगेश कोठावळे, अपर्णा कोठावळे तसेच प्रशिक्षक गोपीनाथ मुंडे, अविनाश होगले यांचे मार्गदर्शन तिला लाभले.
आराध्या शर्मा ही नाशिकमधील बडदे नगर येथील रहिवासी असून ती सध्या सेंट लॉरेन्स हायस्कूल, सिडको, नाशिक येथे इयत्ता नववीमध्ये शिक्षण घेत आहे. शालेय शिक्षणासोबतच स्केटिंग या क्रीडा प्रकारात तिने विशेष प्रावीण्य मिळवले आहे. यापूर्वीही तिने विविध स्तरांवरील स्केटिंग स्पर्धांमध्ये सहभाग नोंदवत अनेक बक्षिसे आणि पुरस्कार प्राप्त केले आहेत.
अभ्यास आणि क्रीडा क्षेत्र यांचा समतोल राखत सातत्यपूर्ण सराव, कठोर मेहनत आणि खेळाप्रती असलेली निष्ठा यामुळे आराध्याने अल्पावधीतच स्केटिंग क्षेत्रात आपली वेगळी ओळख निर्माण केली आहे. मुंबई येथे झालेल्या राज्यस्तरीय स्पर्धेतील सुवर्णपदक हे तिच्या आजवरच्या मेहनतीचे फलित मानले जात आहे.
आराध्याच्या या यशामुळे तिचे कुटुंबीय, शाळेतील शिक्षक, प्रशिक्षक, पीएसए संस्थेचे पदाधिकारी आणि नाशिकमधील क्रीडाप्रेमींमध्ये आनंदाचे वातावरण आहे. तिच्या या यशाचे सर्व स्तरांतून कौतुक होत असून भविष्यात राष्ट्रीय आणि आंतरराष्ट्रीय स्तरावरही ती अशीच चमकदार कामगिरी करेल, असा विश्वास व्यक्त केला जात आहे.
नाशिकच्या या गुणवंत खेळाडूने राज्यस्तरावर मिळवलेले यश हे शहरातील नवोदित खेळाडूंसाठी निश्चितच प्रेरणादायी ठरणार आहे. आराध्या शर्मा हिच्या पुढील क्रीडा वाटचालीसाठी सर्व स्तरांतून शुभेच्छांचा वर्षाव होत आहे.
Leave a Reply