दिवाळी आणि लक्ष्मीपूजन राज्यभर उत्साहात साजरे होत असून या निमित्ताने राज्यातील विविध मंदिरांत आकर्षक सजावट करण्यात आली आहे. नरकचतुर्दशी आणि लक्ष्मीपूजनानिमित्त पंढरपुरातील श्री विठ्ठल आणि रुक्मिणी मातेला हिरेजडीत अलंकारांनी सजवण्यात आले.
विठ्ठलाला हिरेजडीत साज
नरकचतुर्दशी आणि लक्ष्मीपूजनाच्या दिवशी पंढरपुरातील मंदिरात श्री विठ्ठल आणि रुक्मिणी मातेला हिरेजडीत अलंकारांचा साज चढवण्यात आला. विठ्ठलाला सोन्याचा मुकुट, हिरा नाम, कौस्तुभ मणी, दंडपेठ्या जोड, हिऱ्याचे कंगण जोड, मोत्याचा तुरा, मोत्याची कंठी, मोठा शिरपेच, छोटा शिरपेच, मोठी बोर-माळ, हाय-कॉल, पुतळ्यांची माळ, मोहरांची माळ, तोडे जोड, मत्स्य जोड आणि इतर अलंकार घालण्यात आले.
रुक्मिणी मातेचे पारंपरिक अलंकार
रुक्मिणी मातेला खजिन्यात ठेवलेले पारंपरिक स्त्री अलंकार घालण्यात आले. त्यात सोन्याचा मुकुट, जडाऊ हार, नवरत्न हार, खड्यांची वेणी, पाचूची गर्सोली, हिरवी चिंचपेटी, हातसर जोड, पानाड्या हार, ठुशी, मास पत्ता, जडाऊ तनवट जोड, चंद्र, सूर्य, बाजीराव गर्सोली, पेठ्यांची बिंदी, खड्यांच्या पाटल्या, सोन्याचे बाजूबंद, मत्स्य, रुळ जोड, पैंजण जोड, मोठी नथ, कर्णफुले, सोन्याचा करंडा, तोडे जोड, तारामंडळ आणि दशावतारी हार यांचा समावेश होता.
दिवाळीचा दिवस असूनही विठ्ठल-रुक्मिणीच्या दर्शनासाठी हजारो भाविक आणि पर्यटक पंढरपुरात दाखल झाले होते.
स्रोत: मूळ बातमी
Leave a Reply