मध्य प्रदेशातील इंदूरमध्ये सोमवारी रात्री उशिरा घडलेल्या एका दुर्दैवी घटनेत ९५ वर्षीय वृद्ध महिलेचा मृत्यू झाला. हिरा नगर परिसरातील गायत्री नगर भागात त्यांच्या अंथरुणाला आग लागली होती. बाहेरून उडत आलेला फटाका घरात शिरल्यामुळे ही आग लागली असावी, असा कुटुंबाचा दावा आहे. मात्र या घटनेवर पोलिसांनी संशय व्यक्त केला असून तपास सुरू आहे.
मृत महिलेचे नाव गुलबाई नरवरे असे आहे. वयामुळे त्या चालू शकत नव्हत्या आणि बोलण्यासही त्यांना अडचण येत होती. त्यामुळे आग लागल्यानंतर त्या अंथरुणावरून उठू शकल्या नाहीत किंवा मदतीसाठी ओरडूही शकल्या नाहीत, असे कुटुंबाने सांगितले.
कुटुंबाने काय सांगितले?
कुटुंबाच्या म्हणण्यानुसार, रात्री अकरा वाजताच्या सुमारास घरात धूर दिसू लागला, तेव्हा आगीची घटना लक्षात आली. त्यावेळी कुटुंबातील सदस्य खालच्या मजल्यावर जेवण करत होते. ते तातडीने तिसऱ्या मजल्यावरील खोलीत पोहोचले, तेव्हा अंथरूण पूर्णपणे आगीच्या ज्वाळांनी वेढलेले दिसले. कुटुंबाने स्वतःहून आग विझवली आणि आजींना एमवाय रुग्णालयात नेले. तिथे पहाटे तीन वाजताच्या सुमारास डॉक्टरांनी त्यांना मृत घोषित केले.
गुलबाईंचा मुलगा दीपक याने सांगितले की, खोलीत इतर कोणतीही ज्वलनशील वस्तू नव्हती आणि खोलीचा दरवाजा उघडाच होता. त्यामुळे बाहेरून आलेला एखादा फटाका अंथरुणावर पडून आग लागली असावी, असा कुटुंबाचा दावा आहे. वृद्धापकाळामुळे गुलबाई बहुतेक वेळ अंथरुणावरच असायच्या आणि हालचालीसाठी त्या पूर्णपणे इतरांवर अवलंबून होत्या.
पोलिसांना का वाटतो संशय?
सहाय्यक पोलीस आयुक्त रुबिना मिझवानी यांनी कुटुंबाच्या दाव्यावर शंका उपस्थित केली आहे. परिस्थिती संशयास्पद असल्याचे त्यांनी म्हटले आहे. विशेष म्हणजे, घटनेची माहिती कुटुंबाने नव्हे, तर रुग्णालयाने हिरा नगर पोलीस ठाण्याला दिली, याकडे त्यांनी लक्ष वेधले.
एसीपी मिझवानी यांनी सांगितले की, कुटुंबातील सदस्यांचे जबाब अद्याप नोंदवलेले नाहीत. हे कुटुंब इमारतीच्या पहिल्या मजल्यावर राहते, दुसऱ्या मजल्यावर भाडेकरू राहतात, तर वृद्ध महिला तिसऱ्या मजल्यावरील एका खोलीत राहत होत्या. नेमकी घटना कशी घडली, याचा तपास सुरू असल्याचे त्यांनी सांगितले. ऐन दिवाळीत घडलेल्या या घटनेमुळे नरवरे कुटुंबावर शोककळा पसरली आहे.
स्रोत: मूळ बातमी
Leave a Reply