मराठी मनोरंजनसृष्टीतील लोकप्रिय अभिनेत्री गिरीजा ओक-गोडबोले सध्या तिच्या एका खास पोस्टमुळे चर्चेत आली आहे. तिने पती सुहृद गोडबोले यांच्यासोबतचा एक सुंदर फोटो शेअर करत लग्नाच्या १५ व्या वाढदिवसाच्या शुभेच्छा दिल्या आहेत. फोटोसोबत लिहिलेल्या ओळींनी चाहत्यांचे लक्ष वेधून घेतले आहे.
तिने लिहिले आहे की, ‘हॅपी १५ वर्षे पार्टनर.. मला खूप आनंद आहे की मला हे आयुष्य तुझ्यासोबत जगायला मिळत आहे.’ आयुष्याचा प्रवास एकत्र करण्यासाठी जोडीदार मिळाल्याचा आनंद तिने या शब्दांत व्यक्त केला आहे. तिच्या या पोस्टवर चाहते आणि मनोरंजनसृष्टीतील कलाकारांकडून शुभेच्छांचा वर्षाव होत आहे.
सुहृद गोडबोले यांच्याविषयी
गिरीजा यांचे पती सुहृद गोडबोले हे मराठी मनोरंजनसृष्टीतील प्रसिद्ध निर्माते आणि दिग्दर्शक आहेत. त्यांचे वडील श्रीरंग गोडबोले हे देखील चित्रपटसृष्टीतील प्रसिद्ध निर्माते आणि दिग्दर्शक आहेत. सुहृद यांनी ‘पुणे ५२’ आणि ‘बाजी’ यांसारख्या मराठी चित्रपटांच्या निर्मितीशी संबंधित काम केले आहे. चित्रपट निर्मिती आणि दिग्दर्शनासोबतच त्यांनी गीतलेखन आणि इव्हेंट डिझाइनिंग क्षेत्रातही काम केले आहे. ते कोक्वेलिकॉट पिक्चर्स या निर्मिती संस्थेच्या माध्यमातून चित्रपट आणि ओटीटीसाठीही कार्यरत आहेत. दोघांचाही मनोरंजनसृष्टीशी जवळचा संबंध असल्यामुळे त्यांच्यातील समजूतदारपणा त्यांच्या नात्यात महत्त्वाचा ठरला आहे.
पहिली भेट आणि लग्नाची गोष्ट
गिरीजा आणि सुहृद यांची पहिली भेट २००८ मध्ये दिग्दर्शक आदित्य सरपोतदार यांच्या साखरपुड्याच्या कार्यक्रमात झाली होती. त्यावेळी दोघांमध्ये फारसे बोलणे झाले नव्हते. त्यानंतर एका प्रोजेक्टच्या निमित्ताने त्यांचा पुन्हा संपर्क आला. एका कार्यक्रमाच्या सूत्रसंचालनासाठी गिरीजाची निवड झाली होती. त्यावेळी सुहृद यांनी तिला फोन करून कार्यक्रमाच्या तारखा, मानधन आणि वेशभूषेबद्दल चर्चा केली होती. गोव्यामध्ये शूटिंगदरम्यान दोघांची प्रत्यक्ष भेट झाली. त्यावेळी त्यांच्यातील एक मजेशीर समानता लक्षात आली. दोघांनाही गणिताची फारशी आवड नव्हती. गोव्यातील बाजारात खरेदी करताना सामानाची बेरीज करण्यासाठी दोघेही मोबाइलमधील कॅल्क्युलेटरचा वापर करत होते. हा किस्सा सांगताना गिरीजाने आम्ही दोघेही एकसारखेच आहोत, असे म्हटले होते. त्यानंतर त्यांच्या काही मित्रांनी एकमेकांना डेट करून पाहण्याचा सल्ला दिला. दोघांनीही एका कॅफेमध्ये भेटण्याचा निर्णय घेतला आणि हळूहळू त्यांच्या मैत्रीचे प्रेमात रूपांतर झाले.
गिरीजा आणि सुहृद यांनी २०११ मध्ये हिंदू विवाहपद्धतीनुसार लग्न केले. त्यांच्या लग्नाची गोष्टही तितकीच हटके आहे. गिरीजाचे आई-वडील विभक्त झालेले असल्यामुळे लग्नाच्या बोलणीच्या वेळी तिच्या कुटुंबाकडून नेमके कोणाशी बोलायचे, असा प्रश्न सुहृदच्या कुटुंबीयांना पडला होता. त्यावेळी गिरीजाने स्वतःच माझ्याशी लग्नाची बोलणी करा, असे सांगितले होते. दोघांना साधेपणाने लग्न करायचे होते. मात्र, गिरीजाच्या आईची लेकीचे लग्न थाटामाटात व्हावे अशी इच्छा होती. अखेर कुटुंबीयांच्या उपस्थितीत त्यांचा विवाहसोहळा पार पडला. आज या दोघांना कबीर नावाचा मुलगा आहे. अभिनय, चित्रपट आणि कौटुंबिक जबाबदाऱ्या सांभाळत गिरीजा तिचा संसारही तितक्याच आनंदाने जगते.
स्रोत: मूळ बातमी
Leave a Reply