गोकुळच्या अध्यक्षपदाची निवडणूक पार पडत असताना अजित पवार यांच्या एका जुन्या भाषणाची चर्चा पुन्हा सुरू झाली आहे. चंदगड, आजरा आणि गडहिंग्लज परिसरातील नागरिकांनी केलेल्या नागरी सत्काराच्या वेळी अजित पवार यांनी राजेश पाटील यांच्या पराभवाबद्दल आपली खंत व्यक्त केली होती.
फेटा का बांधला नाही?
सत्काराच्या वेळी अजित पवार म्हणाले होते की, चंदगडकरांनी आपुलकीने आपला सत्कार केला आणि त्यानंतर आपण पुन्हा उपमुख्यमंत्री झालो. मात्र यावेळी सत्कार स्वीकारताना आपण फेटा बांधला नाही, कारण मनात एकच विचार होता — आपला उजवा हात असलेले राजेश पाटील पराभूत झाले आहेत. राजेश पाटील यांना पुन्हा निवडून द्या, तर जितके सांगाल तितके फेटे बांधेन, असं आवाहन त्यांनी उपस्थितांना केलं होतं. ‘गड आला, पण सिंह गेला,’ अशी खंत त्यांनी व्यक्त केली होती. त्यांच्या मते, संपूर्ण कोल्हापूरमध्ये महायुतीचे सगळे आमदार निवडून आले, मात्र एकट्या राजेश पाटील यांचा पराभव झाला.
राजेश पाटील यांचा राजकीय प्रवास
राजेश पाटील हे राष्ट्रवादी काँग्रेसचे माजी आमदार असून चंदगड मतदारसंघातून २०१९ साली ते आमदार झाले होते. २०२४ च्या निवडणुकीत भाजप बंडखोर शिवाजी पाटील यांनी त्यांचा पराभव केला. त्यांचे वडील नरसिंगराव पाटील हेदेखील चंदगडमधून आमदार होते. राजेश पाटील हे शिवसेनेचे माजी खासदार संजय मंडलिक यांचे मेहुणे आहेत. अजित पवार मुख्यमंत्री होईपर्यंत फेटा बांधणार नाही, असा निर्धार राजेश पाटील यांनी केला होता, असंही सांगितलं जातं. गोकुळच्या अध्यक्षपदी निवड झाल्याने आता त्यांच्या राजकीय प्रवासाला नवी दिशा मिळाली आहे.
स्रोत: मूळ बातमी
Leave a Reply