कोल्हापूरच्या गोकुळ दूध संघाच्या अध्यक्षपदाची निवडणूक सोमवारी पार पडली. महायुतीचे उमेदवार आणि माजी आमदार राजेश पाटील अध्यक्ष झाले. न्यायालयाने अंतिम निकालाची तारीख राखून ठेवली असली तरी निवडणूक घेण्याचे निर्देश दिले होते. त्यानुसार अध्यक्षपदाची निवड प्रक्रिया पूर्ण झाली. संचालक मंडळाच्या निवडणुकीत महायुती 13-12 ने मागे पडली होती, मात्र अध्यक्षपदाच्या मतदानात 16-13 अशी आघाडी घेत सत्ता मिळवली. शासनाने नेमलेल्या चार संचालकांची मते महायुतीच्या बाजूने पडल्याचे निकालातून स्पष्ट झाले.
कायदा आणि संस्थेच्या मागे असल्याचे मुख्यमंत्र्यांचे म्हणणे
मुख्यमंत्री देवेंद्र फडणवीस यांनी या घडामोडीवर प्रतिक्रिया देताना सांगितले की, गोकुळच्या विषयात कायदा आणि संस्था यांच्या मागे उभे राहणे हेच आपले धोरण आहे. एका गटाचे 13 तर दुसऱ्या गटाचे 12 संचालक निवडून आले होते. त्यामुळे गणपूर्ती पूर्ण होत नव्हती आणि एकाच गटाच्या पाठबळावर अध्यक्ष निवडता येत नव्हता, असे त्यांनी नमूद केले. सरकारला हवे असते तर निवडणुकीनंतर लगेच संचालक नेमले असते, पण गणपूर्तीसाठी बहुमत नसल्याचे लक्षात आल्यानंतरच निर्णय घेण्यात आला, असे मुख्यमंत्र्यांनी सांगितले. उच्च न्यायालयाने काल अध्यादेशात कोणतीही त्रुटी नसल्याचे सांगितले आणि चार जणांची मते वेगळी ठेवून निवडणूक पूर्ण करण्याचे निर्देश दिले, असेही फडणवीस म्हणाले.
निवडणुकीला राजकीय रंग दिल्याचा आरोप; राहुल गांधींवर टीका
मुख्यमंत्र्यांनी पुढे सांगितले की, सतेज पाटील आणि हसन मुश्रीफ यांनी एकत्र येऊन निर्णय घेतला असता तर शासनाने संचालक पाठवले नसते. मात्र, या निवडणुकीला राजकीय रंग देण्यात आला आणि त्यात राहुल गांधीही उतरले, असा आरोप त्यांनी केला. सहकार क्षेत्रातील अनुभव असलेल्या लोकांची संचालक म्हणून निवड करण्यात आली आहे. एखादा स्त्रीरोगतज्ज्ञ संचालक असेल तर त्यात चूक काय, असा सवाल मुख्यमंत्र्यांनी केला. देशाच्या विरोधी पक्षनेत्याला या विषयात लक्ष घालावे लागत असेल तर स्त्रीरोगतज्ज्ञ हा साधा माणूस आहे, असे ते म्हणाले.
राहुल गांधी यांचे आंदोलन म्हणजे सर्व संस्थांबद्दल अविश्वास निर्माण करण्याचा काँग्रेसचा प्रयत्न असल्याचे फडणवीस म्हणाले. कोणतीही संस्था न्याय देऊ शकणार नाही आणि संविधानाबद्दलही अविश्वास निर्माण करण्याचा त्यांचा प्रयत्न असल्याचे त्यांनी नमूद केले. अल्ट्रा लेफ्टिस्ट अशी व्यवस्था उभी करण्याचा प्रयत्न सुरू आहे. विरोधक रस्त्यावर उतरले, त्याला उत्तर देण्यासाठी आम्हीही रस्त्यावर आलो आहोत, असे सांगत मुख्यमंत्र्यांनी भाजपच्या लोकशाही बचाव आंदोलनाचे समर्थन केले. राहुल गांधी नेपाळमध्ये आलेली व्यवस्था इथे आणू इच्छितात, असा आरोप त्यांनी केला. विरोधकांना संसदेत चर्चा करायची नाही, म्हणून रस्त्यावर उतरून उत्तर दिले जात आहे, असे ते म्हणाले. संविधानाने निर्माण केलेल्या संस्थांवर प्रश्नचिन्ह उपस्थित केले जात आहे. सर्वोच्च न्यायालय, रिझर्व्ह बँक आणि सर्व संस्था दबावाखाली असल्याचे सांगितले जाते. युरोपातील काही देशांत अशी परिस्थिती निर्माण झाली आहे, असेही ते म्हणाले. अशा दिमागी नक्षलवाद्यांना जशास तसे उत्तर दिले जाईल आणि त्यांचा काहीही परिणाम होणार नाही, असे फडणवीस म्हणाले.
स्रोत: मूळ बातमी
Leave a Reply