गोकुळ अध्यक्षपदी राजेश पाटील; विरोधी पॅनलला सहकार्याचं आवाहन

गेल्या काही दिवसांपासून राज्यभर चर्चेत असलेल्या कोल्हापूर जिल्हा दूध उत्पादक संघ अर्थात गोकुळच्या अध्यक्षपदाची निवडणूक अखेर पार पडली. या निवडणुकीत महायुतीचे राजेश पाटील विजयी झाले. त्यांनी काँग्रेस आमदार सतेज पाटील यांच्या नेतृत्वाखालील समविचारी आघाडीचे उमेदवार शशिकांत पाटील चुयेकर यांचा पराभव केला. राजेश पाटील यांना १६ मते मिळाली, तर सतेज पाटलांच्या उमेदवाराला १३ मते मिळाली.

निवडीनंतर पाटलांची पहिली प्रतिक्रिया

अध्यक्षपदी निवड झाल्यानंतर राजेश पाटील यांनी सर्व मतदारांचे आभार मानत गोकुळच्या प्रगतीसाठी काम करण्याचा निर्धार व्यक्त केला. मुख्यमंत्री देवेंद्र फडणवीस, उपमुख्यमंत्री एकनाथ शिंदे आणि उपमुख्यमंत्री सुनेत्रा पवार यांच्या मार्गदर्शनाखाली ही निवडणूक झाली, असं ते म्हणाले. पॅनलचं नेतृत्व करणारे हसन मुश्रीफ, जिल्ह्याचे नेते चंद्रकांत पाटील, पालकमंत्री प्रकाश आबिटकर, खासदार धनंजय महाडिक, खासदार धैर्यशील माने, माजी खासदार संजय मंडलिक, आमदार अमल महाडिक आणि आमदार चंद्रदीप नरके यांच्यासह इतर नेत्यांच्या मार्गदर्शनाखाली निवडणूक झाल्याचंही त्यांनी सांगितलं. पाच लाख दूध उत्पादकांसह सर्व जनतेचे आभार त्यांनी मानले.

चंदगडला ६३ वर्षांनंतर प्रतिनिधित्व

६३ वर्षांनंतर चंदगडसारख्या दुर्गम आणि डोंगराळ भागाला गोकुळच्या माध्यमातून प्रतिनिधित्व मिळालं आहे. हसन मुश्रीफ यांनी कार्यकर्त्यावर जिल्हा दूध संघाची जबाबदारी सोपवली आहे. येणाऱ्या वर्षभराच्या कालावधीत सर्व संचालकांना सोबत घेऊन जिल्ह्यातील दूध उत्पादकांचं आणि गोकुळ संस्थेचं वैभव कसं वाढवता येईल, यासाठी प्रयत्न करणार असल्याचं पाटील म्हणाले. गोकुळसारखी संस्था राज्यभर नावाजली जाते; आता ही संस्था देशपातळीवर कशी नेता येईल, यासाठी आपला प्रयत्न असणार आहे. गेल्या वर्षभरात झालेला तोटा भरून काढला जाईल, असं आश्वासनही त्यांनी दिलं आहे.

सतेज पाटलांच्या पॅनलला काय आवाहन?

विरोधी पॅनलमधून लढलेल्या संचालकांनाही राजेश पाटील यांनी महत्त्वाचं आवाहन केलं आहे. निवडणूक संपलेली आहे, अध्यक्ष निवड झाले आहेत आणि न्यायालयाच्या माध्यमातून आदेश प्राप्त झाला आहे. त्यामुळे आता इतर गोष्टी करण्यापेक्षा दूध उत्पादकांच्या हिताच्या गोष्टी हातात हात घालून करणं गरजेचं आहे, असं ते म्हणाले. झालं गेलं ते विसरून जाऊन एकदिलाने आणि एकमनाने गोकुळच्या हिताचं कार्य करूया आणि बाकीचं राजकारण बाजूला ठेवूया, असं आवाहन त्यांनी केलं.

स्रोत: मूळ बातमी