बल्गेरियात ७० वाहनांचा अपघात; ११ जणांचा मृत्यू

बल्गेरियातील एका महामार्गावर ७० हून अधिक कार आणि ट्रक यांचा भीषण साखळी अपघात झाला आहे. दाट धुक्यामुळे पुढचे दिसणे कठीण झाल्याने ही दुर्घटना घडल्याचे मानले जाते. धडकेनंतर अनेक वाहनांना आग लागल्याने अपघाताची तीव्रता आणखी वाढली.

नेमकं काय घडलं?

हा अपघात बल्गेरियातील ट्राकिया (ए-१) महामार्गावर यांबोल परिसरात घडला. हा महामार्ग राजधानी सोफिया आणि पूर्वेकडील बर्गास शहराला जोडतो. आधी एका बसची ट्रकला धडक बसली, त्यानंतर मागून येणारी वाहने एकमेकांवर आदळत गेली. महामार्गाच्या दोन्ही बाजूंना साखळी अपघात झाले. महामार्गावर अचानक धुके पसरल्याने चालकांना पुढचे दिसणे कठीण झाले होते. रस्ता ओला असल्याने वेगावर नियंत्रण न राहिल्यामुळे वाहनांना वेळेत ब्रेक लावता आला नाही. एका प्रत्यक्षदर्शीच्या म्हणण्यानुसार, पुढचे दिसणे ३० मीटरपर्यंत कमी झाले होते.

मृतांचा आकडा वेगवेगळा का?

बल्गेरियाच्या पंतप्रधानांनी सांगितले की, या अपघातात ११ जणांचा मृत्यू झाला असून ४९ जण जखमी झाले आहेत. मात्र दुसऱ्या एका आंतरराष्ट्रीय वृत्तसंस्थेने मृतांचा आकडा १२ वर पोहोचला असून जखमी ४६ असल्याचे वृत्त दिले आहे. जखमींना रुग्णालयात दाखल करण्यात आले आहे.

बचावकार्य आणि शोक

घटनेची माहिती मिळताच पोलीस, रुग्णवाहिका आणि अग्निशमन दल घटनास्थळी दाखल झाले. जखमींना रुग्णालयात नेण्यासाठी सरकारी आणि लष्करी विमानांची मदत घेण्यात आली. अपघातामुळे महामार्गावरील वाहतूक दोन्ही दिशांनी बंद करण्यात आली असून प्रशासनाने परिसरात आपत्कालीन सूचना जारी केल्या आहेत. बचावकार्य पूर्ण झाल्यानंतर या अपघाताची तपासणी सुरू करण्यात येणार असून, अपघात झालेल्या वाहनांमध्ये अडकलेल्या लोकांचा शोध आपत्कालीन पथके घेत आहेत.

जळत्या वाहनातून एका व्यक्तीला बाहेर काढण्याची धाडसी घटनाही यावेळी घडली. एकाने जॅकचा वापर करून गाडीची खिडकी फोडली आणि जळत्या वाहनातून एका माणसाला बाहेर काढले. युरोपियन कमिशनच्या अध्यक्षा त्या वेळी ब्लॅक सी प्रादेशिक दौऱ्यावर बल्गेरियामध्ये होत्या; त्यांनी दुर्घटनेची माहिती मिळताच शोक व्यक्त केला. बल्गेरियाच्या पंतप्रधानांनी आपले ठरलेले दौरे रद्द करून घटनास्थळी भेट देण्यासाठी रवाना झाले.

स्रोत: मूळ बातमी