फटाक्यांवरील निर्बंध आणि सुरक्षिततेच्या वारंवार आवाहनानंतरही मुंबईत दिवाळीत आगींचे सत्र कायम राहिले. रविवारी मुंबई अग्निशमन दलाला आगीचे तब्बल १४२ कॉल प्राप्त झाले. यापैकी १३७ आगी थेट फटाक्यांमुळे लागल्याची नोंद झाली. या घटनांमध्ये दोन महिला जखमी झाल्या. त्यामुळे सार्वजनिक ठिकाणी फटाके वाजवण्यावरील बंदीचा फज्जा उडाल्याचे चित्र दिसून आले.
शहरभर आगी, झोननिहाय आकडेवारी
आग विझवण्यासाठी अग्निशमन दलाची दिवसभर धावपळ सुरू होती. सर्वाधिक ५३ कॉल झोन चारमधील बोरिवली, दहिसर, मालाड आणि कांदिवली परिसरातून आले. त्यापैकी ५१ आगी फटाक्यांमुळे लागल्या. झोन दोनमध्ये वरळी, वडाळा, शिवडी आणि दादर परिसरात २३ आगींची नोंद झाली. त्यापैकी २२ घटना फटाक्यांशी संबंधित होत्या. झोन तीनमधील अंधेरी, विलेपार्ले आणि वांद्रे परिसरातही २३ आगी लागल्या. त्यापैकी २२ आगी फटाक्यांमुळे लागल्याचे स्पष्ट झाले.
मानखुर्द, चेंबूर, गोवंडी आणि घाटकोपर परिसराचा समावेश असलेल्या झोन पाचमधील १२ आगी फटाक्यांमुळे लागल्याची नोंद झाली. झोन एकमध्ये फोर्ट, कुलाबा ते भायखळा परिसरातून आठ कॉल आले. त्यापैकी सात घटनांमागे फटाके कारणीभूत ठरले. मुलुंड, भांडुप आदींचा समावेश असलेल्या झोन सहामध्ये नोंदविलेल्या सर्वच्या सर्व २३ आगी फटाक्यांमुळे लागल्या होत्या.
महामुंबईतही आगींचे सत्र
ठाणे, कल्याण-डोंबिवली, नवी मुंबई आणि भाईंदर परिसरातही दिवाळीच्या पहिल्या रात्री फटाक्यांमुळे आगीच्या अनेक घटना घडल्या. ठाण्यात तीन हात नाका येथील रहेजा गार्डनमधील १७ मजली इमारतीच्या इलेक्ट्रिक डक्टला लागलेली आग सातव्या ते चौदाव्या मजल्यापर्यंत पसरली. या घटनेत ५० नागरिकांची सुटका करण्यात आली. कल्याण-डोंबिवलीत दिवसभरात ७० आगींची नोंद झाली. तर आदेशाचे उल्लंघन केल्याप्रकरणी दोघांवर गुन्हे दाखल झाले. भाईंदरमध्ये १०७ आगींच्या घटना घडल्या. नवी मुंबईत एका रात्रीत ६२ आगी लागल्या.
दरम्यान, सणाच्या उत्साहापुढे रविवारी फटाक्यांवरील निर्बंधांचा मोठ्या प्रमाणावर भंग झाल्याचे दिसून आले. रविवारी रात्री दहानंतरच नव्हे, तर पहाटेपर्यंत मुंबईच्या अनेक भागांत फटाके वाजवले जात होते. रस्ते, गल्ल्या, पदपथ आणि सोसायट्यांच्या आवारात फटाक्यांची आतषबाजी सुरू होती. यामुळे त्रस्त झालेल्या नागरिकांनी मुंबई पोलिसांच्या नियंत्रण कक्षात तक्रारींचा पाऊस पाडला. रविवारी नियंत्रण कक्षात फटाक्यांशी संबंधित तक्रारींचे तीन हजारांपेक्षा जास्त फोन आल्याचे पोलिसांनी सांगितले.
रॉकेट फटाक्यांवर बंदी
मुंबई आणि नवी मुंबईत दिवाळीत फटाक्यांमुळे आगीच्या घटना वाढल्याने रॉकेटसह हवेत उडणाऱ्या तत्सम फटाक्यांवर प्रतिबंधात्मक बंदी घालण्यात आली आहे. मुंबईत ९ नोव्हेंबरपासून २५ नोव्हेंबरच्या रात्री ११.५९ वाजेपर्यंत हे आदेश लागू राहणार आहेत. तर, नवी मुंबईत ९ नोव्हेंबर ते ८ जानेवारी २०२७ पर्यंत ही बंदी लागू राहणार आहे. फटाक्यांमुळे आग लागण्याचा धोका असल्याने हा निर्णय घेण्यात आला असून उल्लंघन केल्यास आपत्ती व्यवस्थापन कायद्यानुसार कारवाई होईल, असा इशारा प्रशासनाने दिला आहे.
गेल्या काही वर्षांशी तुलना करता आगींचे प्रमाण वाढत असल्याचे दिसते. २०२४ मध्ये २६२ कॉल आले होते, त्यापैकी ८० आगी फटाक्यांमुळे लागल्या होत्या आणि ३ जण जखमी झाले होते. २०२५ मध्ये २८९ कॉल आले, त्यापैकी ११३ आगी फटाक्यांमुळे लागल्या. तर ६ ते ९ नोव्हेंबर २०२६ या काळात २८२ कॉल आले, त्यापैकी २०० आगी फटाक्यांमुळे लागल्या. या काळात १ मृत्यू आणि ६ जखमी अशी नोंद आहे.
या पार्श्वभूमीवर महापौर रितू तावडे यांनी नागरिकांना सुरक्षिततेला प्राधान्य देण्याचे आवाहन केले. ‘आपल्या सणाचा आनंद दुसऱ्याच्या दुःखाचे कारण बनू नये’, असे त्यांनी नमूद केले.
आग लागल्यास किंवा आपत्कालीन परिस्थिती उद्भवल्यास नागरिकांनी मुंबई अग्निशमन दलाच्या १०१ क्रमांकावर संपर्क साधावा. तसेच ९०७६३३३१०१, ९०७६३३३१०२, ९०७६३३३१०३, ९०७६३३३१०४, ९०७६३३३१०५ किंवा महापालिकेच्या १९१६ क्रमांकावरही संपर्क साधता येईल, असे आवाहन अग्निशमन दलाने केले आहे.
स्रोत: मूळ बातमी
Leave a Reply