कृत्रिम बुद्धिमत्तेचा वापर वाढत असताना त्याचा फटका आता नोकऱ्यांना बसू लागला आहे. ऑस्ट्रेलियातील सर्वात मोठ्या विमान कंपनीने सुमारे ८५० कर्मचाऱ्यांची कपात करण्याचा निर्णय घेतला आहे. कंपनी आपली अनेक कामे एआय आणि नव्या तंत्रज्ञानाच्या मदतीने पूर्ण करणार आहे.
क्वांटास एअरवेजने ही कपात जाहीर केली आहे. कंपनीच्या म्हणण्यानुसार, विमान वाहतूक क्षेत्रात तंत्रज्ञान वेगाने बदलत आहे आणि त्याच्याशी जुळवून घेण्यासाठी कामाच्या पद्धतीत बदल करणे आवश्यक झाले आहे. याचाच एक भाग म्हणून ही कपात केली जात आहे.
कोणत्या कर्मचाऱ्यांवर परिणाम होणार?
या कपातीचा परिणाम प्रामुख्याने कंपनीच्या बॅक-ऑफिस आणि कॉर्पोरेट विभागांवर होणार आहे. वित्त, खरेदी, मानव संसाधन आणि विपणन या विभागांतील कर्मचाऱ्यांच्या नोकऱ्या यामध्ये येणार आहेत. कंपनीने स्पष्ट केले आहे की, काही कामे सल्लागार कंपनी ॲक्सेंचरकडे सोपवली जाणार आहेत आणि ही कामे प्रामुख्याने भारतातील ॲक्सेंचरच्या टीमकडून हाताळली जातील.
याचा अर्थ असा की, सध्या ऑस्ट्रेलियात केले जाणारे काही काम आता भारतातून पूर्ण होणार आहे. मात्र, भारतात या कामांसाठी किती कर्मचारी नेमले जातील, याबाबत कंपनीने काहीही स्पष्ट केलेले नाही. त्यामुळे भारतात रोजगार वाढेल, याची कोणतीही हमी देता येत नाही.
कपात का आणि कधी?
क्वांटासकडे एक हजारांहून अधिक जुने सॉफ्टवेअर आणि प्रणाली आहेत. कंपनीने ॲक्सेंचरसोबत भागीदारी करून आधुनिकीकरण, ऑटोमेशन आणि एआयचा वापर वाढवण्याची योजना आखली आहे. कर्मचारी कपातीची प्रक्रिया पुढील काही काळात पूर्ण होणार असून पहिला टप्पा २०२७ पर्यंत लागू होण्याची अपेक्षा आहे.
एआयच्या वाढत्या वापरामुळे भविष्यात आणखी किती नोकऱ्या जाऊ शकतात, हा प्रश्न या निर्णयामुळे पुन्हा एकदा समोर आला आहे. पारंपरिक स्वरूपाच्या नोकऱ्या धोक्यात येत असून कर्मचाऱ्यांसमोर नवे तंत्रज्ञान शिकण्याचे आणि स्वतःची कौशल्ये अद्ययावत ठेवण्याचे आव्हान उभे राहिले आहे.
स्रोत: मूळ बातमी
Leave a Reply