दिवाळीच्या सणासुदीच्या काळात नवी मुंबई आणि पनवेल परिसरात दुचाकीस्वार लुटारूंनी धुमाकूळ घातला आहे. रस्त्यावरून मोबाईलवर बोलत जाणाऱ्या नागरिकांना आणि महिलांच्या गळ्यातील सोन्याच्या दागिन्यांना लक्ष्य करून अवघ्या काही सेकंदांत ऐवज लुटून पसार होण्याच्या घटना मोठ्या प्रमाणावर वाढल्या आहेत. १ ते ६ नोव्हेंबर या सहा दिवसांच्या कालावधीत वाशी, सीवूड्स, खारघर, पनवेल आणि कामोठे परिसरात अशा सहा घटना घडल्या असून, त्यामुळे नागरिकांमध्ये भीतीचे वातावरण निर्माण झाले आहे.
बहुतांश घटनांमध्ये दुचाकीवरून आलेल्या दोघांनी रस्त्यावरील नागरिकांचे महागडे मोबाईल, सोन्याची चेन आणि गंठण असा लाखो रुपयांचा ऐवज लांबवला आहे. या घटनांमागे एकाच सराईत टोळीचा हात आहे की वेगवेगळ्या टोळ्या सक्रिय आहेत, यादृष्टीने पोलिसांकडून कसून तपास सुरू आहे.
मोबाईल आणि दागिने हिसकावण्याच्या घटना
वाशीतील मीनाताई ठाकरे उद्यानाजवळ ४ नोव्हेंबरला मोबाईलवर बोलत चाललेल्या व्यक्तीच्या हातातील एक लाख ३० हजार रुपये किमतीचा मोबाईल दुचाकीवरून आलेल्या दोघांनी हिसकावून नेला. त्याच दिवशी सीवूड्स सेक्टर ४२ मधील पंजाब नॅशनल बँकेसमोरील बस थांब्याजवळून पायी जाणाऱ्या व्यक्तीचा एक लाख ३० हजार रुपये किमतीचा मोबाईल लुटण्यात आला. खारघरमध्ये ३ नोव्हेंबरला ओवेगाव पोलिस चौकीजवळील गुप्ता क्लिनिक परिसरात एका व्यक्तीला शिवीगाळ करून त्याच्या खिशातील एक लाख ५० हजार रुपये किमतीचा फोन आणि सोन्या-चांदीचा ऐवज लुटण्यात आला. पनवेल शहर पोलिस ठाण्याच्या हद्दीत १ नोव्हेंबरला पळस्पे ते जेएनपीए महामार्गावरील करंजाडे फाट्याजवळ तीन जणांनी एका व्यक्तीचा ५९ हजार ९९९ रुपये किमतीचा मोबाईल जबरदस्तीने हिसकावला. लुटारूंनी मोबाईलमधील फोन-पे ॲपचा वापर करून पाच हजार रुपयेही परस्पर काढून घेतले.
वाशी सेक्टर १७ मधील ओंकार सोसायटीबाहेरील पदपथावर ६ नोव्हेंबरला मोबाईलवर बोलत चाललेल्या महिलेच्या गळ्यातील दीड लाख रुपये किमतीची सोन्याची चेन दुचाकीस्वारांनी हिसकावून नेली. याच दिवशी खांदा कॉलनी परिसरात किया शोरुमजवळ पायी जाणाऱ्या महिलेच्या गळ्यातील तब्बल सहा लाख ५० हजार रुपये किमतीचे, ५० आणि १५ ग्रॅम वजनाचे दोन सोन्याचे गंठण हेल्मेटधारी दुचाकीस्वारांनी ओरबाडून नेले. या घटनेतील दागिन्यांची किंमत पाहता लुटारूंचे धाडस वाढल्याचे स्पष्ट होत आहे.
सीसीटीव्हीच्या आधारे शोधमोहीम
सणासुदीच्या काळात बाजारपेठा आणि सार्वजनिक ठिकाणी नागरिकांची गर्दी वाढते. मोबाईलवर बोलण्यात किंवा खरेदीत गुंतलेल्या नागरिकांना लक्ष्य करून लुटारू संधी साधत आहेत. दुचाकीवरून वेगाने पसार होणे ही या घटनांमधील समान पद्धत आहे. या घटनांच्या पार्श्वभूमीवर पोलिसांकडून सीसीटीव्ही फुटेजच्या माध्यमातून लुटारूंचा शोध घेण्यात येत आहे. सणासुदीच्या काळात नागरिकांनी रस्त्यावरून चालताना मोबाईलचा वापर टाळावा, महागडे दागिने उघड्यावर घालणे टाळावे आणि संशयास्पद हालचाली आढळल्यास तातडीने पोलिसांना कळवावे, असे आवाहन पोलिसांकडून करण्यात येत आहे.
स्रोत: मूळ बातमी
Leave a Reply