दिवाळीच्या आनंदाच्या वातावरणात नागपुरातून एक हृदयद्रावक घटना समोर आली आहे. गडचिरोली जिल्ह्यातील सूरजागड येथील शाळेत शिक्षक म्हणून काम करणाऱ्या दांपत्याने नागपुरातील राहत्या घरी आपले आयुष्य संपवले. हे दांपत्य दिवाळीची सुट्टी घालवण्यासाठी नागपुरात आले होते.
मनीष प्रल्हाद गणवीर आणि सोनाली मनीष गणवीर असे या पती-पत्नीचे नाव आहे. ही घटना नागपूरमधील बेलतरोडी पोलीस ठाण्याच्या हद्दीतील रेवतीनगर परिसरात घडली. घटनेमुळे संपूर्ण परिसरात खळबळ उडाली आहे.
ऑगस्टमध्ये विवाह, काही दिवसांतच वाद
मिळालेल्या माहितीनुसार, मनीष आणि सोनाली यांचा हा दुसरा विवाह होता. दोघांचे यापूर्वी घटस्फोट झाले होते. त्यानंतर त्यांनी ऑगस्ट महिन्यात कोर्ट मॅरेज करून नव्या आयुष्याला सुरुवात केली होती. मात्र, काही दिवसांतच त्यांच्यात खटके उडू लागले.
मनीष यांचे आई-वडील नातेवाईकांसोबत बौद्धगया येथे गेले होते, तरीही ते या दोघांच्या सातत्याने संपर्कात होते. शनिवारी दुपारी पती-पत्नीमध्ये वाद झाला आणि त्यानंतर रात्री त्यांनी हे टोकाचे पाऊल उचलले.
भाच्यामुळे प्रकार उघडकीस
दोघांचाही फोन लागत नसल्यामुळे मनीष यांच्या आईने आपल्या भाच्याला घरी कुणी आहे का, हे पाहण्यासाठी पाठवले. भाचा घरी पोहोचला तेव्हा घराचा दरवाजा बंद होता. त्याने बरीच बेल वाजवली, परंतु आतून कोणताही प्रतिसाद मिळाला नाही.
संशय आल्याने तो टिनाच्या शेडवर चढून दुसऱ्या माळ्यावरील गॅलरीत गेला. तिथून खिडकीतून आत डोकावून पाहिले असता त्याला धक्कादायक दृश्य दिसले. त्याने तत्काळ शेजाऱ्यांना, नातेवाईकांना आणि पोलिसांना याची माहिती दिली. बेलतरोडी पोलिसांनी घटनास्थळी पोहोचून प्रकरणाची नोंद केली असून अधिक तपास सुरू आहे.
स्रोत: मूळ बातमी
Leave a Reply