गडचिरोलीमध्ये भीषण रस्ते अपघातामध्ये दोन जणांचा मृत्यू झाला, तर एक जण गंभीर जखमी झाला आहे. आष्टी येथील चामोर्शी रस्त्यावरील एचपी पेट्रोल पंपासमोर हा अपघात झाला. दोन दुचाकींची समोरासमोर जोरदार धडक झाली. धडक इतकी जोरदार होती की दुचाकीवरून प्रवासी दूरवर फेकले गेले. या अपघातात दोघे जण जागीच ठार झाले, तर एक जण गंभीर जखमी झाला. जखमी व्यक्तीवर रुग्णालयात उपचार सुरू आहेत.
अपघात कसा घडला
अपघाताची माहिती मिळताच आष्टी पोलिस ठाण्याचे पोलिस निरीक्षक महेंद्र वाघ आणि पोलिस कर्मचाऱ्यांनी घटनास्थळी धाव घेतली. घटनास्थळी मोठी गर्दी झाली होती. जखमीला तात्काळ रुग्णालयात दाखल करण्यात आले, तर दोन्ही मृतांचे मृतदेह शवविच्छेदनासाठी रुग्णालयात पाठवण्यात आले. या अपघातानंतर चामोर्शी रस्त्यावर वाहतूक कोंडी झाली होती. दरम्यान, हा अपघात नेमका कसा झाला, यामागचे कारण समजू शकले नाही. या अपघातामध्ये राजू येलमुले आणि श्याम विश्वास या दोघांचा मृत्यू झाला. तर संदीप राजू येलमुले याची प्रकृती गंभीर असून त्याला उपचारासाठी चंद्रपूर येथील रुग्णालयात पाठवण्यात आले आहे. अपघाताच्या घटनेमुळे अनकोडा या गावात हळहळ व्यक्त करण्यात येत आहे. राजू येलमुले आणि संदीप येलमुले हे बापलेक अनकोडावरून आष्टीकडे येत होते. तर श्याम विश्वास हे आष्टीवरून आपल्या गावी जात होते.
अमरावतीत एसटी बस उलटली
दरम्यान, अमरावतीमध्ये एसटी बसचा अपघात झाला. धोत्रा ते सालोरा मार्गावर एसटी बस उलटली. खराब रस्त्यामुळे एसटी बसचे ब्रेक निकामी झाले, त्यामुळे बस अनियंत्रित होऊन उलटली. शिरसगाव मोझरीवरून अमरावती शहराच्या दिशेने ही एसटी बस येत होती. एसटी बसमध्ये २० ते २५ प्रवासी होते. या अपघातामध्ये १० प्रवाशांना किरकोळ दुखापत झाली. जखमींना उपचारासाठी जिल्हा सामान्य रुग्णालयात हलवण्यात आले.
स्रोत: मूळ बातमी
Leave a Reply