रायगड जिल्ह्यातील शेतकरी आणि पशुपालक यंदा दुहेरी संकटात सापडले आहेत. हंगामाच्या सुरुवातीला पावसाची स्थिती बरी होती, मात्र सप्टेंबरपासून पावसाने दीर्घ विश्रांती घेतली. भाताच्या दाणे भरण्याच्या महत्त्वाच्या टप्प्यावर पाणी मिळाले नाही, त्यामुळे उभे पीक पोचट राहिले आणि उत्पादनात घट झाली.
शेतकरी या नुकसानीतून सावरण्याचा प्रयत्न करत असतानाच काढणीच्या हंगामात अवकाळी पावसाने पुन्हा फटका दिला. शेतात पाणी साचले, कापून बांधून ठेवलेले भाताचे भारे भिजले आणि वाऱ्यामुळे उभे पीक आडवे झाले. भात काळा पडल्याने त्याची गुणवत्ता आणि बाजारभाव या दोन्हींवर परिणाम झाला. पेंढा भिजून सडल्याने जनावरांसाठी साठवलेली वैरणही वाया गेली. परिणामी शेतकऱ्यांसमोर आता केवळ अन्नधान्याचाच नव्हे, तर जनावरांच्या वर्षभराच्या चाऱ्याचाही गंभीर प्रश्न उभा राहिला आहे.
पर्यायी चाऱ्याचा वाढता खर्च
पाली येथील शेतकरी शरद गोळे यांनी सांगितले की, खाण्यासाठी ठेवलेला भात खराब झाल्याने कुटुंबाचा उदरनिर्वाह कसा चालवायचा, हा प्रश्न निर्माण झाला आहे. पेंढा उपलब्ध नसल्याने पशुपालकांना सरकी, शेंगदाणा पेंड आणि सोयाबीन ढेप यांसारखे महागडे पर्याय खरेदी करावे लागणार आहेत. आधीच आर्थिक अडचणीत असलेल्या शेतकऱ्यांवरील खर्चाचा भार यामुळे आणखी वाढणार असून दुग्धव्यवसायही अडचणीत येण्याची शक्यता आहे, असे शेतकरी राम तुपे यांनी सांगितले.
चारा छावण्या सुरू करण्याची मागणी
शेतीचे नुकसान आणि पशुधनाच्या चाऱ्याची टंचाई या दोन्ही संकटांतून बाहेर पडण्यासाठी शासनाने तातडीने पंचनामे करावेत, नुकसानभरपाई द्यावी आणि आवश्यक ठिकाणी चारा छावण्या सुरू कराव्यात, अशी मागणी शेतकरी करीत आहेत.
स्रोत: मूळ बातमी
Leave a Reply