गोकुळवर चार संचालक नियुक्त करण्याच्या राज्य सरकारच्या निर्णयाविरोधात आज कोल्हापुरात विराट मोर्चा निघाला. सतेज पाटील यांच्या नेतृत्वात निघालेल्या या मोर्चामध्ये महाविकास आघाडीचे सर्व बडे नेते उपस्थित होते. एकीकडे राष्ट्रवादीचा गड असलेल्या पश्चिम महाराष्ट्रात सरकारविरोधात एल्गार सुरू असतानाच राष्ट्रवादीचे नेते शरद पवारही या सर्व घडामोडींवर बारकाईने लक्ष ठेवून आहेत. खासदार सुप्रिया सुळे यांनी याबाबतचा एक खास व्हिडिओ आपल्या इन्स्टाग्राम खात्यावरून शेअर केला आहे.
विश्रांती घेतानाही घडामोडींवर लक्ष
गेल्या काही दिवसांपासून ज्येष्ठ नेते शरद पवार हे प्रकृती ठीक नसल्याने विश्रांती घेत आहेत. दोन दिवसांपूर्वीच शरद पवार हे रुग्णालयातून घरी परतले होते. रुग्णालयातून घरी परतल्यानंतर ते आपल्या सिल्वर ओक या निवासस्थानी विश्रांती घेत आहेत, सोबतच ते गोकुळच्या संदर्भात सुरू असलेल्या घडामोडींवरही बारकाईने लक्ष ठेवून आहेत.
आज कोल्हापुरात राज्य सरकारच्या निर्णयाविरोधात विराट असा संघर्ष मोर्चा निघाला. राष्ट्रवादीचे नेते शरद पवार हे आपल्या कार्यालयात बसून या मोर्चामधील घडामोडी बारकाईने पाहत होते. खासदार सुप्रिया सुळे यांनी याबाबतचा एक व्हिडिओ शेअर केला आहे. या व्हिडिओमध्ये शरद पवार हे दूरचित्रवाणीवर कोल्हापुरमधील संघर्ष मोर्चामधील बातम्या पाहताना दिसत आहेत.
सुप्रिया सुळे यांनी काय म्हटले?
सुप्रिया सुळे यांनी आपल्या पोस्टमध्ये नमूद केले की, गोकुळ दूध उत्पादक सहकारी संघाच्या निवडणुकीच्या निकालानंतर शासनाने चार सदस्य नेमण्याचा निर्णय घेतला आहे. या निवडणुकीत काँग्रेसचे नेते सतेज पाटील यांच्या नेतृत्वाखालील पॅनेलने निर्विवाद वर्चस्व प्रस्थापित केले असतानाही ही संस्था कोणत्याही परिस्थितीत ताब्यात घेण्याचा हट्ट अनाकलनीय आहे, असे त्यांनी म्हटले आहे.
याविरोधात कोल्हापूरच्या जनतेने दसरा चौकात जमा होऊन विरोध दर्शवला आहे. या सर्व घडामोडींवर शरद पवार लक्ष ठेवून असून क्षणाक्षणाची माहिती घेत आहेत. कोल्हापूरची जनता आणि गोकुळचे दूध उत्पादक शेतकरी आपल्या न्याय हक्कासाठी करीत असलेल्या संघर्षाला आपला पाठिंबा असल्याचे सुप्रिया सुळे यांनी आपल्या पोस्टमध्ये स्पष्ट केले आहे.
स्रोत: मूळ बातमी
Leave a Reply