रविवारी लक्ष्मीपूजनाच्या दिवशी राज्यभर दिवाळीचा उत्साह शिगेला पोहोचला असतानाच अनेक शहरांमध्ये आगीच्या घटना घडल्या. कुठे फटाक्यांमुळे, तर कुठे शॉर्ट सर्किटमुळे आग लागून मोठी वित्तहानी झाली. मुंबई, ठाणे, नागपूर आणि चंद्रपूरसह राज्यातील अनेक ठिकाणी आगीच्या घटनांनी खळबळ उडाली. दिवाळीच्या दिवशी राज्यात ठिकठिकाणी लागलेल्या आगींमुळे नागरिकांमध्ये भीतीचे वातावरण निर्माण झाले.
भिवंडीत एकाच दिवसात पाच ठिकाणी आग
भिवंडीत गेल्या २४ तासांत एकूण पाच ठिकाणी आगी लागण्याच्या घटना घडल्या. काही ठिकाणी फटाक्यांमुळे आग लागली, तर काही ठिकाणी दुकानात लावलेल्या दिव्यांमुळे आणि काही ठिकाणी शॉर्ट सर्किटमुळे आग लागली. या पाच घटनांमुळे भिवंडी शहर हादरले.
- दुपारी सोनाळे येथे भंगारच्या गोदामाला आग लागली.
- मध्यरात्रीनंतर कामतघर ओसवालवाडी परिसरात फटाक्यामुळे बॅटच्या कारखान्याला आग लागली.
- रात्रीच्या सुमारास गौरीपाडा परिसरात चाळीतील पाच खोल्या जळून खाक झाल्या.
- रात्रीच्या सुमारास कामतघर गणेश नगर येथे दुकानात लावलेल्या दिव्यामुळे बॅगच्या दुकानाला आग लागली.
- रात्रीच्या सुमारास कापआळी परिसरात शॉर्ट सर्किटमुळे सहा दुकाने जळून खाक झाली.
कापआळी परिसरात अचानक झालेल्या शॉर्ट सर्किटने लागलेल्या आगीत कुलर विक्रेता, एलईडी डेकोरेशन लाईट विक्रेता, गुलाबजाम विक्रेता, चप्पल दुकान आणि कपड्यांचे दुकान अशी सहा दुकाने जळून खाक झाली. घटनेची माहिती मिळताच सुरुवातीला अग्निशमन दलाची एक गाडी घटनास्थळी दाखल झाली. तिचे प्रयत्न अपुरे पडल्यानंतर आणखी दोन गाड्या दाखल झाल्या. अग्निशमन दलाच्या तीन गाड्यांनी दोन तासांत ही आग आटोक्यात आणली, परंतु तोपर्यंत सहा दुकानांमधील लाखो रुपयांचे साहित्य जळून खाक झाले होते.
नागपूर, विरारमध्येही आगीच्या घटना
नागपुरातील देव नगर चौकाजवळील सावरकरनगर येथील टीव्हीएस शोरूमला आग लागल्याची घटना घडली. सोबतच शहरातील मेडिकल चौक परिसरात एका इमारतीच्या वरच्या मजल्यावर आग लागल्याने एकच गोंधळ उडाला. विरार पश्चिमेकडील एचडीआयएल कॉम्प्लेक्समधील निवासी इमारतीच्या पहिल्या मजल्यावरील एका घराला रविवारी रात्री १० वाजताच्या सुमारास भीषण आग लागली. आगीने काही वेळातच रौद्र रूप धारण करत वरच्या मजल्यांपर्यंत ज्वाळा पोहोचल्या. घटनेची माहिती मिळताच वसई-विरार महापालिकेच्या अग्निशमन दलाने घटनास्थळी धाव घेत आग विझवली. सुदैवाने आग लागली त्यावेळी घरात कोणीही उपस्थित नव्हते, त्यामुळे मोठी जीवितहानी टळली. घरातील दिव्यांमुळे आग लागल्याचा प्राथमिक अंदाज व्यक्त करण्यात येत असून आगीचे नेमके कारण तपासानंतर स्पष्ट होणार आहे. विद्याविहार रेल्वे स्थानकाला लागून असलेल्या स्कायलाईन विहार इमारतीला लागलेल्या आगीचीही माहिती समोर आली आहे.
दिवाळीसारख्या सणाच्या काळात फटाके, दिवे आणि विद्युत उपकरणांचा वापर वाढतो. त्यामुळे अशा घटना टाळण्यासाठी नागरिकांनी अधिक काळजी घेण्याची गरज या घटनांमधून पुन्हा एकदा अधोरेखित झाली आहे.
स्रोत: मूळ बातमी
Leave a Reply