कोकण आणि पश्चिम महाराष्ट्र जोडणाऱ्या सातारा जिल्ह्यातील केबल स्टेड पुलाचे काम पूर्णत्वाकडे गेले असून लवकरच त्याचे उद्घाटन होण्याची शक्यता आहे. डिसेंबर २०२६ पर्यंत उद्घाटन होईल, असा अंदाज वर्तवला जात आहे. या पुलाचा प्रस्ताव तत्कालीन मुख्यमंत्री मनोहर जोशी यांच्या कारकिर्दीत मांडला गेला होता. नंतर एकनाथ शिंदे मुख्यमंत्री झाल्यावर या प्रकल्पाला गती मिळाली. कोकण आणि पश्चिम महाराष्ट्रातील पर्यटनाला चालना देणारा हा पूल शिंदे यांचा महत्त्वाकांक्षी प्रकल्प मानला जातो.
१७५ कोटींचा प्रकल्प, ४३ मीटर उंच व्ह्यू गॅलरी
सुमारे १७५ कोटी रुपये खर्चून उभारलेला हा पूल ५४० मीटर लांब आणि १४ मीटर रुंद आहे. पश्चिम महाराष्ट्रात अशा स्वरूपाचा केबल स्टे पूल पहिल्यांदाच उभा राहिला आहे. पुलाच्या मध्यभागी ४३ मीटर उंचीवर पर्यटकांसाठी व्ह्यू गॅलरी उभारण्यात आली आहे. गॅलरीत जाण्यासाठी कॅप्सूल लिफ्ट असणार असून दोन्ही बाजूंनी जिन्यांचे मार्गही आहेत. या प्रकल्पाचे काम टी अँड टी कंपनी करत असून अवघ्या तीन वर्षांत पूल उभारण्यात आला आहे. मे महिन्यात तत्कालीन उपमुख्यमंत्री एकनाथ शिंदे यांनी कामाची पाहणी करून पुलाची वाहन चाचणी घेतली होती. गणेशोत्सवात काही काळ हा पूल खुला करण्यात आला होता.
प्रवास ५० किलोमीटरने कमी, पर्यटनाला चालना
या पुलामुळे रत्नागिरी जिल्ह्यातून महाबळेश्वरचे अंतर तब्बल ५० किलोमीटरने कमी होणार आहे. तापोळा ते पलीकडच्या बाजूला गाढवली आहिर असा हा पूल उभारण्यात आला असून कोयना खोऱ्यातील दुर्गम भाग जोडला जाणार आहे. गॅलरीतून सह्याद्रीतील कोयनाचे बॅक वॉटर तसेच सूर्योदय आणि सूर्यास्ताचे विलोभनीय दृश्य पाहता येणार आहे. पावसाळ्यात पाण्यातील बोटीचा धोकादायक प्रवास टाळता येणार आहे. खेड तालुक्यातील रघुवीर घाट मार्ग मात्र धोकादायक असून त्याच्या दुरुस्तीसाठी शासनाने तातडीने पावले उचलावीत, अशी मागणी स्थानिक नागरिकांकडून होत आहे. पुलाचे काम पूर्ण करण्यात महत्त्वाची भूमिका बजावणारे महाबळेश्वरचे तत्कालीन उपमुख्य अभियंता अजय देशपांडे यांच्यासह राज्यातील १८ अभियंत्यांचा सार्वजनिक बांधकाम विभागाकडून गौरव करण्यात आला.
स्रोत: मूळ बातमी
Leave a Reply