छत्रपती संभाजीनगर शहरातील खासगी आस्थापनांना सीसीटीव्ही कॅमेरे बसविणे आता बंधनकारक करण्यात आले आहे. पोलिस आयुक्त प्रवीण पवार यांनी भारतीय नागरिक सुरक्षा संहिता २०२३ च्या कलम १६३ अन्वये यासंदर्भात आदेश जारी केले आहेत. शहरातील गुन्हेगारीला आळा घालणे आणि नागरिकांच्या सुरक्षिततेच्या दृष्टीने पोलिसांनी हा निर्णय घेतला आहे.
त्यानुसार प्रत्येक आस्थापनाच्या सीमारेषेपासून ५० मीटरपर्यंतचा परिसर कॅमेऱ्यांच्या नजरेत येणे आवश्यक आहे. तसेच सीसीटीव्ही यंत्रणा चोवीस तास सुरू ठेवून किमान १५ दिवसांचे रेकॉर्डिंग सुरक्षित ठेवावे लागणार आहे.
कोणत्या आस्थापनांना लागू होणार आदेश?
बँका, एटीएम, हॉटेल्स, लॉज, गेस्ट हाऊस, मॉल, शॉपिंग कॉम्प्लेक्स, पेट्रोल पंप, ज्वेलर्स, शाळा, महाविद्यालये, रुग्णालये, धार्मिक स्थळे, जिम, चित्रपटगृहे, टॉवर्स आणि कार्यालयीन इमारतींसह सर्व खासगी आस्थापनांना या आदेशाचे पालन करावे लागणार आहे.
हे आदेश ६ नोव्हेंबरपासून ४ जानेवारी २०२७ पर्यंत ६० दिवसांसाठी लागू राहणार आहेत.
फुटेज देणे बंधनकारक; उल्लंघन केल्यास कारवाई
सीसीटीव्ही यंत्रणेत किमान १५ दिवसांचे फुटेज सुरक्षित राहणे आवश्यक आहे. त्यासाठी प्लेबॅक आणि फुटेज कॉपी करण्याची सुविधाही उपलब्ध ठेवावी लागणार आहे. परिसरात संशयास्पद हालचाली आढळल्यास तातडीने जवळच्या पोलिस ठाण्याला माहिती देण्याचे निर्देश देण्यात आले आहेत. तसेच पोलिसांनी मागणी केल्यास संबंधित फुटेज उपलब्ध करून द्यावे लागणार आहे.
पोलिस आयुक्तालयाने जारी केलेल्या आदेशाचे उल्लंघन करणाऱ्यांविरुद्ध भारतीय न्याय संहिता २०२३ च्या कलम २२३ अन्वये कायदेशीर कारवाई करण्यात येणार आहे. त्यामुळे संबंधित खासगी आस्थापनांनी निर्धारित निकषांनुसार सीसीटीव्ही यंत्रणा कार्यान्वित ठेवण्याचे आवाहन पोलिसांनी केले आहे.
स्रोत: मूळ बातमी
Leave a Reply