दिवाळीचा सण आनंद आणि रोषणाईचा असतो, पण यंदा फटाक्यांमुळे अनेक ठिकाणी तो आनंद आगीच्या दुर्घटनांमध्ये बदलला. राज्याच्या वेगवेगळ्या भागांत घरं, दुकानं आणि शेती जळाल्याच्या घटना समोर आल्या आहेत. काही कुटुंबांचं मोठं आर्थिक नुकसान झालं आहे.
जिल्ह्या-जिल्ह्यात आगीच्या घटना
धाराशिव जिल्ह्यातील उमरगा शहरातील पतंगे रोड परिसरात फटाक्यांमुळे मंगलाबाई गायकवाड यांच्या घराला आग लागली. घरातील संसारोपयोगी साहित्य जळून खाक झालं. माहिती मिळताच माजी आमदार ज्ञानराज चौगुले घटनास्थळी पोहोचले, आग विझवण्याचे प्रयत्न केले आणि गायकवाड कुटुंबाला आर्थिक मदत दिली.
त्याच तालुक्यातील मुरूम येथील आनंदनगर परिसरातही फटाक्यांमुळे घर आणि गोठ्याला आग लागली. या आगीत घरातील साहित्य, गोठ्यातील वस्तू आणि शेतीची अवजारं जळून मोठं नुकसान झालं.
संगमनेर शहरात दिवाळीच्या दिवशी अकोले रोडवरील बॅटरीच्या दुकानाला आग लागली. फटाक्यांमुळे आग लागल्याचा प्राथमिक अंदाज आहे. आगीची तीव्रता पाहता तीन अग्निशमन केंद्रांच्या गाड्या घटनास्थळी दाखल झाल्या. या दुर्घटनेत दोन दुकानांचं मोठं नुकसान झालं.
नवी मुंबईतील सीवूड्स सेक्टर ५० मधील माऊली इमारतीच्या पाचव्या मजल्यावर आग लागली. अग्निशमन दलानं तातडीनं घटनास्थळी धाव घेत आगीवर नियंत्रण मिळवलं. सुदैवाने या घटनेत कोणतीही जीवितहानी झाली नाही.
विरार पश्चिमेतील एचडीआयएल सोसायटीत रात्री दहाच्या सुमारास एका घराला भीषण आग लागली. फटाक्यांमुळे आग लागल्याची प्राथमिक माहिती समोर आली आहे. आगीच्या ज्वाळा वरच्या मजल्यांपर्यंत पोहोचत असल्याने रहिवाशांना सुरक्षित बाहेर काढण्याचे प्रयत्न करण्यात आले.
बीड जिल्ह्यातील केज शहरातील बीड रोडवर काही दुकानांना अचानक आग लागली. अग्निशमन दलानं वेळीच आग आटोक्यात आणल्याने मोठा अनर्थ टळला. मात्र आगीचं नेमकं कारण आणि आर्थिक नुकसानीचा आकडा अद्याप स्पष्ट झालेला नाही.
शेतीचंही मोठं नुकसान
या आगींच्या घटनांमध्ये केवळ घरं आणि दुकानंच नाही, तर शेतीचंही मोठं नुकसान झालं. परभणी जिल्ह्यातील गंगाखेड शहरालगत शेतकरी अनिल चौधरी यांच्या सहा एकरांवरील उसाला आग लागून संपूर्ण पीक जळून खाक झालं. आग नेमकी कशामुळे लागली, हे अद्याप स्पष्ट झालेलं नाही. अग्निशमन दल घटनास्थळी पोहोचलं, मात्र आग नियंत्रणात आणण्यासाठी अतिरिक्त मदत मागवावी लागली.
एकीकडे दिवाळीचा आनंद साजरा होत असताना दुसरीकडे या दुर्घटनांमुळे अनेक कुटुंबांवर आर्थिक संकट ओढवलं आहे. फटाके फोडताना योग्य खबरदारी न घेतल्यास काही क्षणांचा उत्साह मोठ्या दुर्घटनेला कारणीभूत ठरू शकतो, हे या घटनांनी पुन्हा एकदा अधोरेखित केलं आहे.
स्रोत: मूळ बातमी
Leave a Reply