दिवाळी महोत्सवातून महिला बनल्या ‘लखपती दीदी’

जळगाव जिल्ह्यातील नशिराबाद-भादली बुद्रुक प्रभागातील महिला बचत गटांनी दिवाळी महोत्सवातून आपल्या उत्पादनांना बाजारपेठ मिळवून दिली आहे. या महोत्सवात महिला स्वयंसहाय्यता समूहांनी तयार केलेल्या विविध घरगुती आणि पारंपरिक वस्तूंच्या विक्रीचे स्टॉल उभारले होते. त्यातून महिलांच्या आर्थिक सक्षमीकरणाला आणि स्वयंरोजगाराला प्रोत्साहन मिळाले.

फराळ, दिवे आणि साड्यांची विक्री

या महोत्सवाचे आयोजन ग्रामविकास व पंचायतराज विभागांतर्गत महाराष्ट्र राज्य ग्रामीण जीवनोन्नती अभियान (उमेद), जिल्हा ग्रामीण विकास यंत्रणा आणि पंचायत समितीतर्फे करण्यात आले होते. आधार महिला प्रभाग संघाच्या वतीने झालेल्या या महोत्सवात महिलांनी स्वतः तयार केलेले घरगुती पारंपरिक फराळ, आकाश कंदील, आकर्षक दिवे, इमिटेशन ज्वेलरी, साड्या आणि इतर विविध वस्तू विक्रीसाठी ठेवल्या होत्या.

लाखोंची उलाढाल; ‘लखपती दीदी’कडे वाटचाल

या उपक्रमामुळे महिलांना आपल्या कौशल्याचे प्रदर्शन करण्याची, उत्पादनांची विक्री करण्याची आणि स्वतःच्या उत्पन्नात वाढ करण्याची संधी मिळाली. महिला स्वयंसहायता समूहाच्या माया भावसार, सुनीता भावसार, वैशाली तारकस, कृष्ण वर्षा वाणी, लीना वाणी, भारती पाटील, ज्योती पूनसे या प्रमुख महिलांनी पारंपरिक चविष्ट फराळ, लक्ष्मीच्या मूर्ती, पणत्या, पूजेचे साहित्य, आकाश कंदील, शोभेच्या वस्तू, साड्या आणि इमिटेशन ज्वेलरी विकून लाखोंची उलाढाल केली. बचत गटांच्या माध्यमातून केवळ बचत आणि आर्थिक व्यवहारांपुरते मर्यादित न राहता महिलांनी उत्पादन, व्यवसाय, विपणन आणि उद्योजकतेच्या क्षेत्रातही पुढाकार घ्यावा, हा या महोत्सवामागील प्रमुख उद्देश होता. अशा उपक्रमांमधून ग्रामीण महिला ‘लखपती दीदी’ होण्याच्या दिशेने वाटचाल करीत आहेत, असे सांगण्यात आले. या महोत्सवासाठी जिल्हा ग्रामीण यंत्रणेचे प्रकल्प संचालक राजू लोखंडे, गटविकास अधिकारी चंद्रकांत बोडरे, जिल्हा अभियान व्यवस्थापक हरेश्वर भोई यांच्या मार्गदर्शनाखाली प्रभाग समन्वयक हेमांगी टोकेकर यांनी पुढाकार घेतला. आधार महिला प्रभाग संघातील पदाधिकारी आणि प्रभागातील १८ ग्रामसखी ताई यांचे विशेष सहकार्य लाभले.

स्रोत: मूळ बातमी