नाशिकमध्ये रात्रीच्या तापमानात दररोज घट होत असून हिवाळ्याची चाहूल लागली आहे. रात्री अकरानंतर वातावरणात गारवा जाणवू लागला आहे. गेल्या आठवडाभरात किमान तापमानात तब्बल आठ अंशांची घसरण झाली आहे. त्याचवेळी कमाल तापमानात मात्र वाढ झाली आहे. त्यामुळे दिवसा कडक ऊन आणि रात्री गार वारा असे संमिश्र वातावरण सध्या अनुभवायला मिळत आहे.
परतीच्या पावसाने दडी मारल्याने ऑक्टोबर महिन्यात उकाड्याचा चटका वाढला होता. मात्र आता ऋतुमानात बदल होत असून थंडीची चाहूल लागली आहे. सोमवारी (२ नोव्हेंबर) शहराचे किमान तापमान २२ अंशांवर होते. आठवडाभरात पाऱ्यात घसरण होऊन रविवारी (८ नोव्हेंबर) तापमान १४.२ अंश नोंदवले गेले. अचानक झालेल्या या घसरणीमुळे आरोग्याच्या तक्रारी वाढण्याची शक्यता वर्तवली जात आहे.
आठवडाभरातील तापमान
गत आठवड्यातील नोंदीनुसार सोमवारी किमान २२ तर कमाल २८.४ अंश तापमान होते. मंगळवारी किमान १८.३ आणि कमाल ३३.३, बुधवारी किमान १८.२ आणि कमाल ३४, गुरुवारी किमान १८.४ आणि कमाल ३३.९, शुक्रवारी किमान १७.३ आणि कमाल ३२.३, शनिवारी किमान १५ आणि कमाल ३३ तर रविवारी किमान १४.२ आणि कमाल ३२.९ अंश तापमान नोंदवले गेले. किमान तापमान सातत्याने खाली येत असताना कमाल तापमान मात्र ३२ ते ३४ अंशांच्या दरम्यान राहिले.
दिवाळीत किरकोळ वाढ, नंतर थंडी वाढणार
दिवाळीच्या काळात घरोघरी केली जाणारी पणत्यांची रोषणाई आणि आतषबाजीमुळे पुढील दोन दिवस तापमानात किरकोळ वाढ होण्याचा अंदाज आहे. मात्र दिवाळी संपल्यानंतर लागलीच थंडीमध्ये वाढ होईल, असा अंदाज वर्तवण्यात आला आहे. विषम वातावरणामुळे आरोग्यविषयक तक्रारींमध्ये वाढ होण्याचा अंदाज वैद्यकीय तज्ज्ञांनी वर्तवला आहे. ऋतुमानातील बदल लक्षात घेऊन आहार आणि विहारात बदल करताना आरोग्य ठणठणीत राखण्याचा सल्ला दिला जात आहे.
स्रोत: मूळ बातमी
Leave a Reply