दुधेबावी ग्रामविकास प्रतिष्ठानच्या वतीने आयोजित दुधेबावी फेस्टिव्हलमध्ये मंगळवारी, १० नोव्हेंबरला गुणवंतांचा सन्मान सोहळा होणार आहे. यूपीएससी, एमपीएससीसह विविध स्पर्धा परीक्षांमध्ये यश संपादन केलेल्या यशस्वी उमेदवारांना ‘यशवंत’ पुरस्काराने गौरविण्यात येणार आहे. ही माहिती प्रतिष्ठानचे अध्यक्ष शशिकांत सोनवलकर यांनी दिली.
मान्यवरांच्या उपस्थितीत सोहळा
हा सन्मान सोहळा जिल्हा पोलिस अधीक्षक निखिल पिंगळे यांच्या हस्ते होणार असून, महसूल विभागाच्या उपसचिव अश्विनी यमगर-देशमुख या अध्यक्षस्थानी राहणार आहेत. विशेष अतिथी म्हणून मंत्रालयातील कृषी विभागाचे उपसचिव गणेश कचरे, गोंदियाच्या उपजिल्हाधिकारी ज्योती कांबळे, धाराशिवच्या जिल्हा क्रीडा अधिकारी सुप्रिया गाढवे-मुळीक, जिल्हा शिक्षण व प्रशिक्षण संस्था फलटणचे प्राचार्य जितेंद्र साळुंखे, जिल्हा सहकार उपनिबंधक संजयकुमार सुद्रिक, फलटणचे तहसीलदार डॉ. अभिजित जाधव आणि अभिनेते रामभाऊ जगताप उपस्थित राहणार आहेत.
कोणाकोणाचा होणार गौरव
यूपीएससी परीक्षेत यशस्वी झालेले सोहम नामदेव शेंडे आणि विनायक शंकर धुमाळ, पोलिस उपनिरीक्षकपदी निवड झालेले विशाल नारायण वाघ, निखिल हनुमंत घनवट आणि अर्जुन आण्णा हाके, कक्ष अधिकारीपदी निवड झालेले शुभम संभाजी ढोक, मंडल कृषी अधिकारीपदी निवड झालेल्या प्राजक्ता अनिल नाळे, राज्य कर निरीक्षकपदी निवड झालेल्या सुप्रिया संपत आडके, महसूल सहाय्यकपदी निवड झालेले तुषार जयवंत जाधव, रोहित नारायण कदम आणि तेजश्री आनंदराव गावडे, प्रशासकीय अधिकारीपदी निवड झालेल्या रांची हणमंत बनकर आणि कनिष्ठ अभियंतापदी निवड झालेल्या दूर्वा सतीश निंबाळकर यांचा ‘यशवंत’ पुरस्काराने गौरव करण्यात येणार आहे. याच कार्यक्रमात सातारा जिल्हा जात प्रमाणपत्र पडताळणी समितीचे उपायुक्त उमेश घुले यांच्या हस्ते ‘दुधेबावी भूषण’ पुरस्काराचे वितरण होणार आहे. आदर्श माता-पिता पुरस्काराचे वितरण फलटणचे गटशिक्षणाधिकारी सी. जी. मठपती यांच्या हस्ते होणार असून, क्रांतिज्योती सावित्रीबाई फुले विचार मंच, चौधरवाडीचे अध्यक्ष तुकाराम कोकाटे आणि पत्रकार मनोज पवार हे प्रमुख पाहुणे म्हणून उपस्थित राहणार आहेत.
स्रोत: मूळ बातमी
Leave a Reply