बंगळुरू-गोवा वंदे भारत: ६७० किमी, १२ थांबे, वेळापत्रक

देशाला आणखी एक वंदे भारत ट्रेन मिळणार आहे. ही ट्रेन बंगळुरूमधील यशवंतपूर आणि गोव्यातील मडगावदरम्यान धावणार आहे. भारतीय रेल्वे लवकरच ही नवीन यशवंतपूर-मडगाव वंदे भारत एक्सप्रेस सुरू करणार असून, या मार्गावरील प्रवासादरम्यान प्रवाशांना पश्चिम घाट आणि किनारपट्टीवरील कर्नाटकचे मनमोहक निसर्गदृश्य अनुभवता येणार आहे. ही गाडी आव्हानात्मक ५५ किलोमीटरच्या सकलेशपूर-सुब्रह्मण्य रोड घाट मार्गावरून धावणार आहे.

वेळापत्रक काय आहे

बंगळुरू आणि गोवा दरम्यानच्या ६७० किलोमीटरच्या मार्गावर ही ट्रेन १२ प्रमुख स्थानकांवर थांबेल. ही ट्रेन आठवड्यातून सहा दिवस दोन्ही दिशांनी धावेल. यशवंतपूरहून सुटणारी ट्रेन क्रमांक २६६५५ सकाळी ७ वाजून ३५ मिनिटांनी सुटेल आणि रात्री ८ वाजून ५५ मिनिटांनी मडगावला पोहोचेल. या प्रवासाला सुमारे १३ तास २० मिनिटे लागतील. ही गाडी बुधवार वगळता आठवड्याचे सहा दिवस धावेल.

परतीच्या प्रवासात मडगावहून सुटणारी ट्रेन क्रमांक २६६५६ सकाळी ८ वाजून २० मिनिटांनी सुटेल आणि रात्री ९ वाजून १५ मिनिटांनी यशवंतपूरला पोहोचेल. परतीच्या प्रवासाला सुमारे १२ तास ५५ मिनिटे लागतील. ही गाडी गुरुवार वगळता आठवड्याचे सहा दिवस धावेल. या वंदे भारत ट्रेनमधून दररोज जवळपास १,१०० प्रवासी प्रवास करतील, असा अंदाज आहे.

प्रवासात काय पाहायला मिळेल

या मार्गावरील थांब्यांमध्ये श्रवणबेळगोळा, हसन, सकलेशपूर, सुब्रह्मण्य रोड, कबाका पुत्तूर, मंगळुरु जंक्शन, उडुपी, मुरुडेश्वर, गोकर्ण रोड आणि कारवार यांचा समावेश आहे. ही ट्रेन उडुपी आणि गोकर्णासारख्या पर्यटन स्थळांवरूनही जाईल. प्रवासादरम्यान हिरवेगार पर्वतरांगा, खोल धुक्याच्या दऱ्या आणि धबधब्यांचे मनमोहक दृश्य पाहायला मिळेल.

ही वंदे भारत ट्रेन देशातील सर्वात कमी वेगाच्या वंदे भारत ट्रेनपैकी एक असेल. डोंगर आणि नागमोडी दऱ्यांमधून ही गाडी ताशी ५३ ते ५४ किलोमीटर वेगाने प्रवास करेल. डोंगराळ प्रदेश आणि अवघड रेल्वेमार्गामुळे ट्रेनचा वेग नियंत्रित ठेवला जाईल. या कमी वेगामुळे पर्यटकांना घाट आणि दऱ्यांच्या सौंदर्याचा आनंद घेता येईल. या ट्रेनमुळे गोकर्ण, उडुपी, मुरुडेश्वर आणि कारवारला प्रवास करणाऱ्या पर्यटकांना सर्वात जास्त फायदा होईल. या ट्रेनचे डबे बंगळुरूच्या बीईएमएल कंपनीने चेन्नईच्या इंटिग्रल कोच फॅक्टरीमधील तंत्रज्ञानाचा वापर करून तयार केले आहेत. रेल्वेकडून लवकरच ही ट्रेन कधीपासून धावणार याची तारीख जाहीर केली जाईल.

स्रोत: मूळ बातमी