पृथ्वीवर अशी काही ठिकाणे आहेत, जी पाहिल्यावर डोळ्यांवर विश्वास बसत नाही. असेच एक ठिकाण चीनमध्ये आहे. तिथे उभा असलेला पर्वत एखाद्या चित्रासारखा रंगीबेरंगी दिसतो. लाल, पिवळा, नारंगी, हिरवा आणि जांभळा अशा अनेक रंगांच्या छटा त्यावर उमटलेल्या आहेत. त्यामुळे या पर्वताला ‘रेनबो माउंटन्स’ म्हणजेच इंद्रधनुष्यी पर्वत असे नाव मिळाले आहे.
झांग्ये डॅनशिया पर्वत कुठे आहेत?
हे पर्वत चीनच्या गांसू प्रांतात असलेल्या झांग्ये डॅनशिया नॅशनल जिओलॉजिकल पार्कमध्ये आहेत. पर्वतांवर दिसणाऱ्या रंगीबेरंगी रेषा एखाद्या कलाकाराने काढलेल्या चित्रासारख्या भासतात. दूरून पाहिल्यास हे पर्वत रंगीबेरंगी गालिच्यासारखे दिसतात. दररोज हजारो पर्यटक हे दृश्य पाहण्यासाठी तिथे जातात.
हे रंग कसे तयार झाले?
या पर्वतांचे रंग कोणत्याही जादूमुळे तयार झालेले नाहीत. लाखो वर्षे चाललेल्या भूगर्भीय प्रक्रियेतून ते घडले आहेत. वाळूचे खडक आणि लोह ऑक्साइडसारख्या विविध खनिजांच्या थरांमुळे पर्वतांना वेगवेगळे रंग मिळाले आहेत. सकाळी आणि संध्याकाळी सूर्यकिरणे या पर्वतांवर पडतात तेव्हा त्यांचे सौंदर्य आणखी खुलते. विशेषतः सूर्योदय आणि सूर्यास्ताच्या वेळी तिथले दृश्य स्वप्नवत वाटते.
चीनमधील या पर्वतांना २०१० मध्ये युनेस्कोच्या जागतिक वारसा यादीत स्थान मिळाले आहे. याशिवाय पेरूमधील विनिकुंका पर्वतदेखील आपल्या सात रंगांसाठी प्रसिद्ध आहे. निसर्गाची ही रंगांची जादू पाहणाऱ्या प्रत्येकाला मंत्रमुग्ध करते.
स्रोत: मूळ बातमी
Leave a Reply