मालेगाव शहरातील पाचकंदील परिसरातील नागरिक मूलभूत सुविधांच्या अभावामुळे त्रस्त झाले आहेत. पाच कंदील, रथ गल्ली, कापसे गल्ली, सराफ बाजार, टिळक रोड आणि जैन मंदिर परिसर या भागांत स्वच्छता, पाणीपुरवठा, पथदिवे आणि डास प्रतिबंधक उपाययोजना या सेवा कोलमडल्या आहेत. महापालिका या भागाकडे दुर्लक्ष करत असून त्याला कायम दुय्यम वागणूक दिली जाते, असा आरोप स्थानिकांनी केला आहे. त्यांनी महापालिकेच्या उपायुक्त डॉ. सुनिता कुमावत यांच्याकडे तातडीने उपाययोजना करण्याची मागणी केली आहे.
हा भाग शहरातील महत्त्वाची व्यापारी पेठ म्हणून ओळखला जातो. नगरपालिकेच्या काळात आणि महापालिका स्थापन झाल्यानंतर सुमारे दहा वर्षांपर्यंत येथे रोज कचरा उचलला जात होता, रस्त्यांवर दिवे लागत होते, डासांवर फवारणी होत होती आणि पाणीपुरवठाही नियमित होता. मात्र गेल्या काही वर्षांत येथील अनेक जुने रहिवासी स्थलांतरित झाल्यानंतर या भागाकडे महापालिकेचे लक्ष कमी झाले, असे नागरिक सांगतात.
कचरा साचतो; डासांचा प्रादुर्भाव वाढला
परिसरात कचरा रोज उचलला जात नाही. त्यामुळे अस्वच्छता पसरली असून डासांचा प्रादुर्भाव मोठ्या प्रमाणात वाढला आहे. साथीच्या आजाराचा धोका निर्माण झाल्याने मलेरिया प्रतिबंधक फवारणी करण्याची गरज निर्माण झाली आहे.
मोकाट जनावरे आणि भटक्या कुत्र्यांची दहशत
येथील मोकळ्या भुखंडावर रात्री-अपरात्री नशा करणाऱ्या इसमांचा वावर वाढला आहे. त्यांचा तातडीने बंदोबस्त करण्याची मागणी करण्यात आली आहे. रस्त्यावर मोकाट जनावरे ठाण मांडून बसत असल्याने वाहतुकीला अडथळा निर्माण होतो. भटक्या कुत्र्यांची दहशत वाढली असून लहान मुले व पादचाऱ्यांवर कुत्रे धावून येतात.
या भागातील सर्व समस्या सोडविण्यासाठी संबंधित विभागप्रमुखांना तात्काळ आदेश द्यावेत, अशी मागणी मनोज पाटणकर, राजेंद्र दुसाने, मुकेश दुसाने, विजय पाटणकर, पुनम चौरसकर, सुषमा पाटणकर, योगिता पाटणकर, विद्या पाटणकर, तृप्ती नेरकर, अंकिल देवरे, प्रियंका देवरे, संजय साईनकर, फरीदा अरिफ हुसेन, आसिफ हुसैन, अली अहमद, तुषार पाटील आदी नागरिकांनी केली आहे.
स्रोत: मूळ बातमी
Leave a Reply