जगभरात दिवाळीचा सण साजरा होत असताना अमेरिकेत एक वाईट घटना समोर आली आहे. तिथे दिवाळीच्या उत्सवादरम्यान वांशिक द्वेषाची एक घटना घडली. अमेरिकेतील अति-उजव्या विचारसरणीचे कार्यकर्ते जेक लँग याने सिएटलमध्ये आयोजित दिवाळी कार्यक्रमात व्यत्यय आणण्याचा प्रयत्न केला. एवढेच नाही, तर त्याने सोशल मीडियावर हिंदू समुदायाविरुद्ध अपमानास्पद मजकूरही पोस्ट केला.
मिळालेल्या माहितीनुसार, शनिवारी वॉशिंग्टन राज्यातील सिएटल येथे हा दिवाळी कार्यक्रम पार पडत होता. जेकने गोंधळ घालायला सुरुवात केल्यावर उपस्थित असलेल्या काही लोकांनी त्याला रोखले. या घटनेदरम्यान लँग आणि त्यांच्यासोबत असलेल्या आंदोलकांनी हातात फलक धरले होते. त्या फलकांवर भारतीयांना उद्देशून वापरला जाणारा एक अपमानास्पद शब्दप्रयोग असलेली घोषणा लिहिलेली होती. मात्र कार्यक्रमाला उपस्थित असलेल्या लोकांनी या सगळ्यांना पुढे जाण्यापासून रोखले.
जेक लँगने सोशल मीडियावर पोस्ट केले फोटो
जेक लँगने सोशल मीडियावर काही फोटो पोस्ट केले आहेत. त्यामधून तो समारंभात व्यत्यय आणण्याचा प्रयत्न करताना दिसत आहे. यासोबतच त्याने हिंदूंविरुद्ध अपमानास्पद भाषेचाही वापर केला. त्याने असा दावा केला की, टेक्सास राज्य डेमोक्रॅटिक पक्षाच्या बाजूने जाण्यामागे हिंदू जबाबदार आहेत.
आपल्या पोस्टच्या मजकुरात जेक लँगने लिहिले की, सिएटलच्या दिवाळी उत्सवात डझनभर लोकांनी आमच्यावर हल्ला केला आणि त्यांना आमचा फलक आवडला नाही. हिंदूंनी टेक्सास निळा केला, असा आक्षेपही त्याने नोंदवला. त्याच्या या पोस्टमुळे वाद आणखी वाढला आहे.
पराभवाचा राग हिंदूंवर काढल्याचा आरोप
या घटनेमागचे कारण असे समोर आले आहे की, मध्यावधी निवडणुकांमध्ये रिपब्लिकन पक्षाचा पराभव झाल्यामुळे जेक लँग अस्वस्थ होता. डोनाल्ड ट्रम्प यांच्या पराभवाचा राग त्याने हिंदू समुदायावर काढला, असे सांगितले जात आहे. आनंदाच्या वातावरणात साजऱ्या होणाऱ्या दिवाळी उत्सवात अशा प्रकारची घटना घडल्याने हिंदू समुदायात नाराजी व्यक्त होत आहे.
स्रोत: मूळ बातमी
Leave a Reply