दिवाळी हा दिव्यांचा आणि प्रकाशाचा सण म्हणून ओळखला जातो. या दिवशी प्रत्येक घरात दिवे लावून रोषणाई केली जाते. घराच्या अंगणापासून ते बाल्कनी, खिडक्या आणि छतापर्यंत सर्वत्र दिव्यांची सजावट पाहायला मिळते. मात्र दिवाळीच्या रात्री घराच्या मुख्य दरवाजावर आवर्जून दिवा लावण्याची परंपरा आहे. यामागे केवळ सजावटीचा उद्देश नसून धार्मिक श्रद्धा आणि वास्तुशास्त्राशी संबंधित काही मान्यता आहेत.
लक्ष्मीच्या स्वागताचे प्रतीक
हिंदू धर्मात दिवाळी हा देवी लक्ष्मीच्या आगमनाचा सण मानला जातो. अशी धार्मिक मान्यता आहे की दिवाळीच्या रात्री देवी लक्ष्मी पृथ्वीवर येतात आणि आपल्या भक्तांना सुख-समृद्धीचा आशीर्वाद देतात. त्यामुळे घराचा मुख्य दरवाजा स्वच्छ ठेवून तिथे दिवा लावला जातो. मुख्य दरवाजावर लावलेला दिवा हा देवी लक्ष्मीच्या स्वागताचे प्रतीक मानला जातो. प्रकाशाने उजळलेला दरवाजा घरात सकारात्मकता आणि आनंदाचे वातावरण निर्माण करतो, अशी श्रद्धा आहे.
दिवा हा अंधारावर प्रकाशाच्या विजयाचे प्रतीक मानला जातो. दिवाळीच्या दिवशी घराच्या प्रत्येक कोपऱ्यात दिवे लावण्यामागेही हीच भावना असते. मुख्य दरवाजावर दिवा लावल्याने घरातील नकारात्मकता, अंधार आणि निराशा दूर होऊन सुख, शांती आणि आनंदाचे आगमन होते, अशी धार्मिक धारणा आहे.
वास्तुशास्त्रात दरवाजाचे महत्त्व
वास्तुशास्त्रानुसारही घराचा मुख्य दरवाजा महत्त्वाचा मानला जातो. कारण मुख्य दरवाजा हा घरात ऊर्जा आणि समृद्धी प्रवेश करण्याचे ठिकाण मानले जाते. त्यामुळे दिवाळीच्या रात्री दरवाजावर दिवा लावल्याने घरातील वातावरण शुभ राहते, अशी मान्यता आहे. काही कुटुंबांमध्ये मुख्य दरवाजाच्या दोन्ही बाजूंना दिवे लावले जातात.
दिवा लावताना सुरक्षिततेची काळजी
दिवा लावताना सुरक्षिततेची काळजी घेणेही तितकेच महत्त्वाचे आहे. मुख्य दरवाजावर दिवा ठेवताना तो कोणाच्या पायाला लागणार नाही, अशा सुरक्षित ठिकाणी ठेवावा. तसेच दरवाजाचे पडदे, चपला किंवा इतर ज्वलनशील वस्तूंपासून दिवा दूर ठेवावा. लहान मुले आणि पाळीव प्राण्यांना दिव्यापासून दूर ठेवावे.
स्रोत: मूळ बातमी
Leave a Reply