जळगाव येथील चिमुकले श्रीराम मंदिर दिव्यांग विद्यार्थ्यांनी सजवलेल्या हजारो दिव्यांच्या प्रकाशाने उजळून निघाले. रुशिल मल्टिपर्पज फाउंडेशन संचलित उडान दिव्यांग पुनर्वसन केंद्रातील विद्यार्थ्यांनी यंदाही आपली आगळीवेगळी दिवाळी साजरी करत ११११ पणत्या प्रज्वलित केल्या.
विद्यार्थी आणि पालकांनी सजवलेल्या रंगीबेरंगी पणत्या
उडान दिव्यांग पुनर्वसन केंद्रातर्फे दरवर्षी दीपोत्सव साजरा केला जातो. दिव्यांग विद्यार्थी आणि त्यांच्या पालकांनी सजवलेल्या विविधरंगी पणत्या प्रज्वलित करून हा उपक्रम चिमुकले श्रीराम मंदिरात पार पडतो. यंदाही ११११ पणत्या प्रज्वलित करून दीपोत्सव साजरा करण्यात आला. आमदार मंगेश चव्हाण, जिल्हाधिकारी रोहन घुगे, मिहिका घुगे, जैन उद्योग समूहाचे प्रमुख अशोक जैन, ज्योती जैन, पोलिस अधीक्षक यांच्या पत्नी सानिका धिवरे, ह.भ.प. दादा महाराज जोशी, नगरसेवक अमित काळे, जैन उद्योग समूहाचे मीडिया संचालक अनिल जोशी, सुनील खैरनार, माजी नगरसेवक पांडुरंग (बंडूदादा) काळे, परेश सनांसे आणि वैशाली सनांसे या मान्यवरांच्या प्रमुख उपस्थितीत हा उपक्रम पार पडला.
तीन लाख पणत्या सजवून रोजगार; दृष्टिकोन बदलण्याचा उद्देश
मान्यवरांनी या उपक्रमाचे कौतुक केले. उडान दिव्यांग पुनर्वसन केंद्रातर्फे आयोजित हा उपक्रम स्तुत्य असून दिव्यांग मुलांनी केलेली मेहनत आणि कलाकुसर कौतुकास्पद असल्याचे मान्यवरांनी सांगितले. दिवाळीच्या अगोदर दिव्यांग विद्यार्थी स्वतः तीन लाख पणत्या सुशोभित करतात आणि त्यातून त्यांना रोजगारही मिळतो. दीपोत्सवाच्या माध्यमातून सर्वांच्या आयुष्यात सकारात्मकतेचा प्रकाश पडावा आणि दिव्यांगांकडे बघण्याचा दृष्टिकोन अधिक चांगला व्हावा, हाच या उपक्रमाचा उद्देश असल्याचे उडानच्या अध्यक्षा हर्षाली चौधरी यांनी सांगितले. उपक्रमासाठी हर्षाली चौधरी, प्रवीण चौधरी, हेतल पाटील, जयश्री पटेल, महेंद्र पाटील, कल्पना रोटे, प्रतिभा पाटील, रितेश पाटील आणि वनमाला कोळी यांनी परिश्रम घेतले. अक्षय नेहे यांनी सूत्रसंचालन केले.
स्रोत: मूळ बातमी
Leave a Reply