नंदुरबारात दिवाळीनिमित्त सलग तीन दिवस सांस्कृतिक पहाट कार्यक्रम होणार आहेत. पहाटेच्या प्रसन्न वातावरणात संगीत आणि संस्कृतीचा आनंद घेण्याची संधी रसिकांना मिळणार आहे. तिन्ही कार्यक्रम पहाटे सहा वाजता सुरू होतील.
सोमवारी स्वरांगण दिवाळी पहाट
महाराष्ट्र शासनाच्या सांस्कृतिक कार्य विभाग व सांस्कृतिक कार्य संचालनालयातर्फे सोमवारी, ता. ९ रोजी पहाटे सहाला शहरातील श्रीमती हि. गो. श्रॉफ हायस्कूल येथे स्वरांगण दिवाळी पहाट या विशेष सांस्कृतिक कार्यक्रमाचे आयोजन केले आहे. सांस्कृतिक कार्यमंत्री ॲड. आशिष शेलार यांच्या संकल्पनेतून हा उपक्रम राबविण्यात येत आहे. स्वर साज म्युझिकल ग्रुप नंदुरबार यांच्याद्वारे हा कार्यक्रम सादर केला जाणार आहे. उपस्थित राहण्याचे आवाहन सांस्कृतिक कार्य संचालनालयाचे संचालक प्रशांत खेडकर आणि समन्वयक नागसेन पेंढारकर यांनी केले आहे.
रविवारी स्वरचैतन्य दीपावली पहाट
स्वा. सै. शाहीर हरिभाऊ पाटील सेवाभावी संस्था व लायन्स क्लबच्या संयुक्त विद्यमाने रविवारी, ता. ८ रोजी पहाटे सहाला स्वर चैतन्य दीपावली पहाट कार्यक्रम होणार आहे. नंदुरबार येथील एकलव्य हायस्कूल प्रांगणात हा कार्यक्रम होईल. उपस्थित राहण्याचे आवाहन आयोजकांतर्फे करण्यात आले आहे.
मंगळवारी पहाट पाडवा
लायन्स क्लब व संकल्प ग्रुपच्या विद्यमाने मंगळवारी, ता. १० रोजी पहाटे सहाला नंदुरबार येथील श्रीमती हि. गो. श्रॉफ हायस्कूलमध्ये पहाट पाडवा कार्यक्रमाचे आयोजन केले आहे. रसिकांनी या कार्यक्रमास उपस्थित राहावे, असे आवाहन करण्यात आले आहे. दिवाळीच्या या पहाट कार्यक्रमांमुळे शहरातील सांस्कृतिक वातावरण अधिकच बहरेल, अशी अपेक्षा आहे.
स्रोत: मूळ बातमी
Leave a Reply