अंडी अनेकांना आवडतात आणि आरोग्यासाठीही अंडी महत्त्वाची मानली जातात. ऑम्लेट खाणाऱ्यांची संख्याही मोठी आहे. लहान मुलांपासून मोठ्यांपर्यंत सर्वांना ऑम्लेट आवडतं. मात्र अनेकांना ऑम्लेट बनवताना अडचणी येतात. नाश्त्यासाठी किंवा दुपारच्या जेवणासाठी चांगले ऑम्लेट बनवताना तव्यावरून उलटताना ते विस्कटले, तर निराशा होते. पण स्वयंपाकघरातील काही सोप्या टिप्स माहिती असतील, तर घरीच हॉटेलसारखे मऊ आणि लुसलुशीत ऑम्लेट न तुटता बनवता येईल.
मऊ ऑम्लेटसाठी अंडी अशी फेटा
ऑम्लेट मऊ आणि हलकं बनवण्यासाठी अंड्यांमध्ये थोडे मीठ आणि काळी मिरी घालून काट्याच्या चमच्याने किमान एक ते दोन मिनिटे चांगल्या प्रकारे फेटावे. अंड्यांमधील लहान बुडबुडे ऑम्लेटचा पोत मऊ होण्यास मदत करतात. चांगले फेटल्यामुळे ऑम्लेट तयार झाल्यावर त्याला दुमडणेही सोपे जाते.
अंडं फेटताना त्यात एक चमचा दूध किंवा थंड पाणी घातल्यास ऑम्लेटला अधिक ओलावा आणि मऊपणा येतो. यामुळे ऑम्लेट तव्यावर लवकर जळत नाही आणि त्याला चवही येते. तसेच ऑम्लेटच्या आकाराला साजेसा लहान नॉन-स्टिक तवा निवडावा. तव्याला पुरेसे खोबरेल तेल लावावे आणि तवा गरम झाल्यावरच त्यात अंडं घालावे. यामुळे ऑम्लेट तव्याला चिकटणार नाही.
उलटताना तुटू नये म्हणून काय करावं
खालची बाजू लवकर करपू नये म्हणून ऑम्लेट मध्यम किंवा मंद आचेवर शिजवावे. वरची बाजू अर्धी शिजल्याशिवाय ते उलटवू नये. चमच्याने उलटवताना ऑम्लेटला तडा जाण्याची शक्यता वाटल्यास पॅनवर एक सपाट प्लेट ठेवावी आणि पॅन हळूवारपणे उचलावा. त्यानंतर प्लेटवरून ऑम्लेट परत पॅनमध्ये ठेवल्यास त्याला अजिबात तडा न जाता उलटवता येते.
ऑम्लेटमध्ये जास्त कांदा, टोमॅटो, मिरची यांसारखे पदार्थ घालू नयेत. ते जास्त झाले, तर दुमडताना ऑम्लेट तुटेल. चीज आणि भाज्या खूप बारीक चिरलेल्या असाव्यात. दुमडताना अंडे फुटत असल्याचे लक्षात आले, तर फुटलेल्या भागावर थोडे चीज लावावे. ते चिकटवण्याचे काम करेल. अशा प्रकारे चविष्ट ऑम्लेट घरीच काही मिनिटांत तयार होईल.
स्रोत: मूळ बातमी
Leave a Reply