हार्ले-डेव्हिडसन स्प्रिंट ४४० लाँच; ३४ किमी मायलेजचा दावा

प्रसिद्ध दुचाकी कंपनी हार्ले-डेव्हिडसनने आपली नवी एंट्री-लेव्हल क्रूझर बाइक २०२७ स्प्रिंट ४४० सादर केली आहे. ही बाइक भारतीय रस्त्यांवर लोकप्रिय असलेल्या रॉयल एनफिल्ड मिटिअर ३५० आणि जागतिक बाजारातील होंडा रेबेल ३०० यांना थेट टक्कर देण्यासाठी तयार असल्याचे सांगण्यात येत आहे. हिरो मोटोकॉर्पसोबत मिळून ही मोटरसायकल विकसित करण्यात आली आहे.

लूक आणि डिझाइन

या बाइकच्या डिझाइनमध्ये कंपनीची ओळख असलेली क्रूझर शैली समाविष्ट करण्यात आली आहे. बाइकच्या पुढील बाजूस क्लासिक राउंड एलईडी हेडलॅम्प देण्यात आला आहे, त्यामुळे बाइकला रेट्रोसोबतच आधुनिक स्पर्श मिळतो. बॉब्ड रिअर फेंडर, आकार दिलेली इंधन टाकी आणि खालच्या बाजूला असलेली बैठक यामुळे ही बाइक दूरवरूनही प्रीमियम हार्ले-डेव्हिडसन असल्याचा अनुभव देते.

या बाइकची सर्वात मोठी खासियत म्हणजे तिची सीट उंची. कंपनीने केवळ ६७१ मिमी इतकी कमी सीट उंची दिली आहे. कमी उंचीच्या रायडर्सना किंवा पहिल्यांदाच जड क्रूझर बाइक चालवणाऱ्यांना याचा थेट फायदा होणार आहे. वाहतूक कोंडीत किंवा लांब प्रवासातही बाइक सहज आणि आत्मविश्वासाने नियंत्रित करता येईल.

इंजिन आणि कामगिरी

२०२७ स्प्रिंट ४४० मध्ये ४४० सीसी सिंगल-सिलेंडर, एअर आणि ऑईल-कूल्ड इंजिन देण्यात आले आहे. हे इंजिन ६,००० आरपीएमवर २७ एचपी कमाल शक्ती आणि ४,००० आरपीएमवर ३८ एनएम टॉर्क निर्माण करते. या इंजिनला ६-स्पीड गिअरबॉक्स जोडण्यात आला असून पाचवा आणि सहावा गिअर ओव्हरड्राइव्ह गुणोत्तर म्हणून ट्यून करण्यात आला आहे. त्यामुळे महामार्गावर ताशी ९० ते १०० किमी वेगाने प्रवास करताना इंजिनवर जास्त दबाव जाणवणार नाही आणि रायडर्सना आरामदायी प्रवासाचा अनुभव मिळेल. कंपनीच्या दाव्यानुसार ही बाइक प्रति लिटर ३४ किमीपर्यंत मायलेज देऊ शकते.

भारतात कधी येणार?

ही मोटरसायकल २०२७ च्या सुरुवातीपासून जगभरातील विविध बाजारपेठांमध्ये विक्रीसाठी उपलब्ध होण्यास सुरुवात होणार आहे. मात्र भारतातील लाँचची अचूक तारीख आणि किंमतीबाबत कंपनीने अद्याप अधिकृत घोषणा केलेली नाही. ४४० सीसी प्लॅटफॉर्म हिरो मोटोकॉर्पसोबत मिळून विकसित करण्यात आल्याने ही बाइक भारतीय बाजारातही लवकरच दाखल होण्याची शक्यता व्यक्त केली जात आहे. भारतात एंट्री-लेव्हल प्रीमियम क्रूझर विभागात रॉयल एनफिल्ड मिटिअर ३५० सारख्या बाइक्सची मजबूत पकड आहे. अशा परिस्थितीत स्प्रिंट ४४० भारतात दाखल झाल्यास या विभागातील स्पर्धा आणखी रंगतदार होण्याची शक्यता आहे.

स्रोत: मूळ बातमी