नाशिकच्या निसर्गरम्य परिसरात धावण्याचा वेगळा आणि थरारक अनुभव देणारी ट्रेल स्पर्धा येत्या २० डिसेंबर २०२६ रोजी होणार आहे. सिंहस्थ कुंभमेळ्याच्या पार्श्वभूमीवर ‘गोदा एपिक ट्रेल मॅरेथॉन’ या स्पर्धेचे आयोजन नाशिकजवळील पामस्टे, गंगापूर धरणाच्या बॅकवॉटर परिसरात, गिरणारे येथे करण्यात आले आहे. आरोग्य, फिटनेस, साहस आणि निसर्ग पर्यटन यांचा संगम असलेल्या या स्पर्धेत महाराष्ट्रातील विविध जिल्ह्यांमधील धावपटू, फिटनेसप्रेमी, मॅरेथॉनपटू, युवक आणि साहसी क्रीडाप्रेमी सहभागी होऊ शकतात.
पाच गटांत स्पर्धा
या स्पर्धेमध्ये धावपटूंसाठी ३ किमी ऑब्स्टॅकल रन, ५ किमी, १० किमी, १५ किमी आणि २१ किमी हाफ मॅरेथॉन अशा विविध गटांचा समावेश करण्यात आला आहे. नवोदित धावपटूंपासून ते अनुभवी मॅरेथॉनपटूंपर्यंत सर्वांना त्यांच्या क्षमतेनुसार सहभागाची संधी उपलब्ध होणार आहे. विशेष म्हणजे ३ किमी ऑब्स्टॅकल रनमध्ये विविध अडथळ्यांचा सामना करत धावण्याचा रोमांचक अनुभव घेता येणार आहे.
निसर्ग, आरोग्य आणि पर्यटनाचा संगम
सह्याद्रीच्या कुशीत वसलेले डोंगर, हिरवाईने नटलेले रस्ते आणि गोदावरी नदीचा परिसर या स्पर्धेला वेगळी ओळख देतो. नाशिकची गोदावरी नदी, निसर्गसंपन्न परिसर आणि आगामी सिंहस्थ कुंभमेळ्याच्या पार्श्वभूमीवर नाशिकची ओळख देशभर पोहोचविण्याच्या दृष्टीने हा उपक्रम महत्त्वपूर्ण ठरणार आहे. या माध्यमातून क्रीडा संस्कृतीला प्रोत्साहन देतानाच निसर्ग पर्यटन आणि स्थानिक पर्यटनालाही चालना मिळणार आहे.
नोंदणी सुरू
महाराष्ट्रातील धावपटूंनी या अनोख्या साहसी स्पर्धेत मोठ्या संख्येने सहभागी व्हावे, असे आवाहन आयोजकांतर्फे करण्यात आले आहे. स्पर्धेची नोंदणी सुरू असून इच्छुक स्पर्धकांनी लवकरात लवकर नोंदणी पूर्ण करावी. निसर्गाच्या सान्निध्यातील या साहसी धावण्याच्या अनुभवाचा भाग होण्याची ही उत्तम संधी आहे.
स्रोत: मूळ बातमी
Leave a Reply