मुरबाड तालुक्यातील भुवन येथील जिल्हा परिषद प्राथमिक शाळेत एक वेगळा उपक्रम राबवण्यात आला. साने गुरुजी लिखित ‘श्यामची आई’ हे पुस्तक विद्यार्थ्यांपर्यंत पोहोचवण्यासाठी शाळेने जवळपास दीड महिना दररोज परिपाठाच्या वेळी या पुस्तकाचे अभिवाचन केले. मातृप्रेम, त्याग, संस्कार आणि जीवनमूल्यांचा ठेवा असलेले हे पुस्तक मुलांच्या मनावर ठसावे, हा यामागील हेतू होता.
उपक्रमात शाळेच्या पदवीधर शिक्षिका जयश्री शेलवले यांनी दररोज पुस्तकातील एकेका रात्रीचे भावपूर्ण अभिवाचन केले. विद्यार्थीही नियमितपणे कथा ऐकत होते आणि त्यांचा सारांश तसेच महत्त्वाच्या नोंदी लिहून ठेवत होते. आईचे प्रेम, तिचा त्याग, कुटुंबाचे महत्त्व आणि चांगल्या संस्कारांची जाणीव मुलांना व्हावी, यावर या उपक्रमात भर देण्यात आला. प्रेम, सहकार्य, प्रामाणिकपणा, संवेदनशीलता आणि सामाजिक बांधिलकी यांसारखी जीवनमूल्ये विद्यार्थ्यांमध्ये रुजवण्याचा प्रयत्नही यातून करण्यात आला.
प्रश्नमंजुषा स्पर्धेत विजेत्यांचा सन्मान
पुस्तकाचे पारायण पूर्ण झाल्यानंतर स्पर्धा परीक्षेच्या धर्तीवर बहुपर्यायी प्रश्नमंजुषा घेण्यात आली. या स्पर्धेत आरोही लक्ष्मण म्हाडसे हिने प्रथम, अक्षरा गणेश बांगर हिने द्वितीय, तर खुशी अविनाश राऊत हिने तृतीय क्रमांक पटकावला. विधी देविदास बांगर आणि स्वरा बळीराम बांगर यांना उत्तेजनार्थ पारितोषिके देण्यात आली. पारितोषिक वितरण सोहळ्याला शाळा व्यवस्थापन समितीचे अध्यक्ष दिलीप बांगर आणि शिक्षकवृंद उपस्थित होते.
स्रोत: मूळ बातमी
Leave a Reply