मालेगाव शहर आणि परिसरातील शाळा-महाविद्यालयांमध्ये शिक्षण व सहकार क्षेत्रातील अग्रणी कर्मवीर भाऊसाहेब हिरे यांच्या पुण्यतिथीनिमित्त शुक्रवारी अभिवादन करण्यात आले. कुळकायद्याचे जनक म्हणून ओळखल्या जाणाऱ्या हिरे यांच्या कार्याला उजाळा देत विविध संस्थांमध्ये प्रतिमापूजन आणि पुतळ्याला हार अर्पण करण्यात आला.
शाळा-महाविद्यालयांमध्ये अभिवादन
पुष्पाताई हिरे कला, विज्ञान व वाणिज्य महिला महाविद्यालयात प्राचार्य डॉ. मृणाल भारद्वाज यांच्या हस्ते कर्मवीर हिरे यांच्या प्रतिमेचे पूजन करून अभिवादन करण्यात आले. यावेळी त्यांनी हिरे यांचे शैक्षणिक, सामाजिक व सहकार क्षेत्रातील योगदान विशद केले. उपप्राचार्य डॉ. दीपांजली बोरसे, शैक्षणिक पर्यवेक्षक डॉ. वैजयंती रामावत, कार्यालयीन अधीक्षक गोविंद मगरे यांच्यासह प्राध्यापक व शिक्षकेतर कर्मचारी उपस्थित होते.
मराठी अध्यापक विद्यालय संलग्न सराव पाठशाळेतर्फे हिरे यांच्या समाधीस्थळावर व पूर्णाकृती पुतळ्यास प्राचार्य व्ही. डी. सोनवणे यांनी हार अर्पण करून अभिवादन केले. डी. एम. चौधरी यांनी त्यांच्या शैक्षणिक, सामाजिक व राजकीय कार्याविषयी माहिती दिली, तर प्रा. प्रदीप पाटील यांनी सूत्रसंचालन आणि प्रा. एम. बी. खैरनार यांनी आभार मानले.
मसगा स्वायत्त महाविद्यालयातर्फे हिरे यांच्या पूर्णाकृती पुतळ्यास हार अर्पण करण्यात आला. प्रा. राहुल देसले यांनी त्यांच्या कार्याचा गौरव केला, तर प्राचार्य डॉ. सुभाष निकम यांनी प्रतिमापूजन केले. नोडल ऑफिसर डॉ. कल्याण कोकणे, पर्यवेक्षक प्रा. पी. ए. अहिरे, प्रा. के. के. बच्छाव, कार्यालयीन अधीक्षक डॉ. राजेश निकम, उपप्राचार्य प्रा. अजय ठाकरे आणि प्रा. शशिकांत भदाणे यावेळी उपस्थित होते.
शिक्षण आणि सहकार क्षेत्रातील योगदानाला उजाळा
व्ही. बी. एच. विद्यालय व कनिष्ठ महाविद्यालय, कळवाडी येथे प्राचार्य डी. डी. खरे, उपप्राचार्य एस. ओ. भामरे व पर्यवेक्षक एस. एस. भोईटे यांच्या उपस्थितीत हिरे यांना अभिवादन करण्यात आले. कनिष्ठ विभागाचे प्रमुख प्रा. जितेंद्र देसले यांनी सहकार महर्षी हिरे यांचे शिक्षण व सहकार क्षेत्रातील योगदान याविषयी सखोल माहिती दिली. क्रीडाशिक्षक एस. एस. शिंदे यांनी सूत्रसंचालन केले, तर दर्शन मोरे यांनी आभार मानले.
भारत विद्यालयातर्फे हिरे यांच्या पूर्णाकृती पुतळ्यास अभिवादन करण्यात आले. शाळेच्या प्रांगणात पर्यवेक्षिका वंदना महाल यांच्या हस्ते हार अर्पण करण्यात आला. यावेळी विनयकुमार साळुंके यांनी हिरे यांच्या जीवनकार्याचा सविस्तर आढावा मांडला.
केबीएच माध्यमिक व कनिष्ठ महाविद्यालयात प्राचार्य प्रफुल्ल निकम अध्यक्षस्थानी होते. यावेळी उपमुख्याध्यापक नितीन गवळी, कनिष्ठचे उपप्राचार्य महेश गुंजा, पर्यवेक्षक राजेंद्र बच्छाव, वाल्मीक दासनूर आणि कार्यालय प्रमुख सुरेश मानूर उपस्थित होते. जयवंत याळीस, सुनील धात्रक आणि प्राचार्य निकम यांनी हिरे यांनी शिक्षण, सहकार आणि सामाजिक परिवर्तनाच्या क्षेत्रात केलेल्या कार्याला उजाळा दिला. योगेंद्रसिंग ठोके यांनी सूत्रसंचालन केले, तर परिक्षित नेरकर यांनी आभार मानले.
स्रोत: मूळ बातमी
Leave a Reply