हिंगोली : लोकशाही व्यवस्थेत प्रत्येक मताला असाधारण महत्त्व असते. त्यामुळे युवकांनी मतदानाच्या प्रक्रियेत सक्रियपणे सहभागी होऊन जागरूक आणि जबाबदार नागरिकाची भूमिका पार पाडावी, असे आवाहन खासदार रामराव वडकुते यांनी केले. युवकांचा सजग सहभाग हाच लोकशाही बळकट करण्याचा आणि विकसित भारत घडवण्याचा भक्कम पाया आहे, असेही ते म्हणाले.
केंद्र सरकारच्या युवा कार्यक्रम व क्रीडा मंत्रालयांतर्गत कार्यरत असलेल्या माय भारत केंद्राच्या वतीने भारतरत्न नानाजी देशमुख आयटीआय महाविद्यालयात शुक्रवारी ‘विकसित भारत युवा संवाद – आपले मत जाणून घ्या’ हा जनजागृती कार्यक्रम घेण्यात आला. या कार्यक्रमाला माय भारत केंद्राचे जिल्हा युवा अधिकारी प्रणित सांगवीकर, राष्ट्रीय युवा पुरस्कार विजेते पुष्यमित्र जोशी आणि प्राचार्य रवि बोथीकर उपस्थित होते.
विचारपूर्वक मतदानाचे आवाहन
खासदार वडकुते म्हणाले, कोणत्याही प्रलोभनाला बळी न पडता विचारपूर्वक मतदान करणे आवश्यक आहे. देशाच्या विकासात युवकांचे योगदान महत्त्वाचे असून जबाबदार आणि कर्तव्यदक्ष युवा पिढीच विकसित भारताचे स्वप्न प्रत्यक्षात आणू शकते, असे त्यांनी अधोरेखित केले. जिल्हा युवा अधिकारी प्रणित सांगवीकर यांनी कार्यक्रमाचे प्रास्ताविक केले, तर प्रवीण पांडे यांनी सूत्रसंचालन केले.
युवकांनी घेतली लोकशाहीची शपथ
कार्यक्रमात उपस्थित युवकांना लोकशाहीची शपथ देण्यात आली. युवा संवाद सत्रात विद्यार्थ्यांनी लोकशाही, मतदान, युवकांचे अधिकार, सामाजिक जबाबदारी आणि देशाच्या विकासातील युवकांचे योगदान या विषयांवर उत्स्फूर्तपणे आपली मते मांडली. मान्यवरांनी विद्यार्थ्यांच्या प्रश्नांना मार्गदर्शनातून उत्तरे दिली. यावेळी मतदार नोंदणी आणि मतदार यादी पुनरीक्षण प्रक्रियेची माहिती देण्यात आली. पात्र युवकांनी मतदार म्हणून नोंदणी करावी आणि मतदार यादीतील आपल्या नावाची खात्री करून घ्यावी, असे आवाहन करण्यात आले.
स्रोत: मूळ बातमी
Leave a Reply