दिवाळी जवळ आली की रस्त्याच्या कडेला मातीच्या पणत्या विकणारे छोटे विक्रेते दिसू लागतात. चार पैसे मिळतील या आशेने ते दिवसभर रस्त्यावर बसून पणत्या विकत असतात. अशाच एका महिलेच्या विक्रीसाठी ठेवलेल्या पणत्यांवरून कार गेल्याचा व्हिडिओ समोर आला आहे. काही क्षणांतच तिच्या पणत्यांची माती झाली आणि हा व्हिडिओ पाहताच नेटकऱ्यांचा संताप अनावर झाला आहे.
व्हायरल झालेल्या व्हिडिओमध्ये एक महिला रस्त्याच्या कडेला बसून मातीच्या पणत्या विकताना दिसते. तिच्यासोबत एक लहान मूलही आहे. कागदावर पणत्या विक्रीसाठी पसरवून ठेवल्या होत्या. त्याचवेळी तिथे एक मोठी कार आली आणि कारचे चाक पणत्यांवरून गेले. त्यामुळे महिलेने विक्रीसाठी ठेवलेल्या पणत्यांची माती झाली.
नेटकऱ्यांचा संताप, काहींना शंका
हे सगळे त्या महिला आणि त्या मुलाच्या डोळ्यांसमोर घडत होते. मात्र परिस्थिती गरीब असल्याने त्यांच्यात काही करण्याची हिंमत नव्हती, असे व्हिडिओत दिसते. त्यानंतर काही लोक तिथे जमा झाले आणि उरलेल्या पणत्या गोळा करून एका पोत्यात भरताना दिसले. महिलेच्या चेहऱ्यावरची निराशा पाहून अनेकांनी हळहळ व्यक्त केली आहे.
हा व्हिडिओ सोशल मीडियावर व्हायरल झाल्यानंतर नेटकऱ्यांमध्ये संतापाची लाट उसळली आहे. वाहन चालवताना आजूबाजूला असलेल्या गोष्टींचे भान ठेवावे, असे नेटकरी सांगत आहेत. एखाद्या गरीब व्यक्तीच्या रोजीरोटीचे नुकसान करू नये, असेही मत व्यक्त केले जात आहे. तर काही वापरकर्त्यांच्या मते हा व्हिडिओ रीलसाठी तयार करण्यात आला असावा, असे म्हणणे आहे. काही नेटकऱ्यांनी गरीबीचे प्रदर्शन करून दृश्यसंख्या मिळवण्यावरही नाराजी व्यक्त केली आहे.
घटनेची अधिकृत माहिती अद्याप नाही
या व्हिडिओबाबत एक महत्त्वाची गोष्ट म्हणजे ही घटना नेमकी कुठे घडली आणि कधी घडली, याची अधिकृत माहिती अद्याप समोर आलेली नाही. तसेच कार चालकाने जाणूनबुजून पणत्यांवरून गाडी नेली की हा प्रकार अपघाताने घडला, याचीही स्वतंत्र माहिती समोर आलेली नाही. काही रुपयांसाठी दिवसभर मेहनत करणाऱ्या अशा विक्रेत्यांसाठी त्यांच्या पणत्या म्हणजे केवळ मातीचे दिवे नसतात, तर त्यांच्या घरच्या दिवाळीची आशा असते.
स्रोत: मूळ बातमी
Leave a Reply