हिर्डोशी : भोर तालुक्यातील महावितरणच्या १३ विकासकामांसाठी उपमुख्यमंत्री सुनेत्रा पवार यांच्या माध्यमातून एक कोटी ४० लाख ६० हजार रुपयांचा निधी मंजूर केल्याची माहिती आमदार शंकर मांडेकर यांनी दिली. या निधीतून तालुक्यातील विविध गावांमध्ये नवीन रोहित्रे, खांब आणि वीजवाहिन्यांची कामे होणार आहेत.
कोणत्या कामांसाठी किती निधी
भोरमधील रामबाग चौक येथे अतिरिक्त २२/२०० केव्हीए क्षमतेचे रोहित्र, २२ केव्ही उच्चदाब वहिनीचे पाच खांब व लघुदाब वाहिनीचे पाच खांब बसविण्यासाठी १५ लाख ६४ हजार रुपये मंजूर झाले आहेत. उत्रौली येथे एरियल बंच केबल टाकणे व १० जुने खांब बदलण्यासाठी १० लाख २९ हजार, तर सारोळे येथील महांगरे वस्ती येथे १०० केव्हीए विद्युत रोहित्र बसविण्यासाठी १७ लाख १२ हजार रुपये मिळणार आहेत.
न्हावी ३२२ येथील जिल्हा परिषद शाळा व मंदिर परिसरातील एलटी ओव्हर हेड विद्युत वाहिनीचे एरियल बंच केबलमध्ये रूपांतरण करण्यासाठी ८ लाख १ हजार, कांजळे मेन रोड ते काळूबाई मंदिरापर्यंत विजेचे १० खांब टाकण्यासाठी २ लाख ६३ हजार, तर कांबरे खे.बा. येथील गिरेवाडी येथे नवीन १२ खांब वाहिनीसह १०० केव्हीए विद्युत रोहित्र बसविण्यासाठी १५ लाख ६६ हजार रुपये मंजूर झाले आहेत.
भोलावडे येथे जुने खांब व एरियल केबल बदलण्यासाठी १३ लाख ८९ हजार, पिसावरे व महुडे पाणीपुरवठा योजनेसाठी नवीन १०० केव्हीए विद्युत रोहित्र बसविण्यासाठी ११ लाख ९६ हजार, बारे खुर्द येथे १०० केव्हीए विद्युत रोहित्रासाठी १२ लाख ९४ हजार, आंबवडे घोरपडेवाडी स्मशानभूमीजवळील विद्युत रोहित्र स्थलांतरित करण्यासाठी २ लाख ३४ हजार, टापरेवाडी येथे १०० केव्हीए विद्युत रोहित्रासाठी ८ लाख १६ हजार, हर्णस येथे ११ लाख ६६ हजार, तर म्हाळवडी येथे १०० केव्हीए विद्युत रोहित्र बसविण्यासाठी १० लाख २४ हजार रुपयांचा निधी मंजूर करण्यात आला आहे.
या कामांमुळे भोर तालुक्यातील गावांमधील वीजपुरवठा अधिक सुरळीत होणार असून शेती, पाणीपुरवठा आणि दैनंदिन गरजांसाठी वीज उपलब्ध होण्यास मदत होईल, अशी अपेक्षा आहे.
स्रोत: मूळ बातमी
Leave a Reply