मुंबई ते बंगळुरू या दोन शहरांदरम्यान स्लीपर वंदे भारत एक्सप्रेस सुरू झाली असून तिला प्रवाशांकडून चांगला प्रतिसाद मिळाला आहे. त्यानंतर आता महाराष्ट्रातील महत्त्वाच्या नागपूर ते पुणे या मार्गावरही स्लीपर वंदे भारत सुरू होण्याची शक्यता वर्तवली जात आहे. त्यामुळे विदर्भ आणि पश्चिम महाराष्ट्रातील प्रवाशांमध्ये मोठी उत्सुकता आहे.
नागपूर हे विदर्भातील प्रमुख शहर आहे, तर पुणे हे शिक्षण, आयटी, उद्योग आणि रोजगाराचे मोठे केंद्र आहे. या दोन्ही शहरांदरम्यान विद्यार्थी, नोकरदार आणि व्यावसायिकांची नेहमीच तुडुंब गर्दी असते.
सध्या या मार्गावर चेअरकार प्रकारातील वंदे भारत एक्सप्रेस धावत आहे. मात्र या प्रवासाला १२ तास लागतात, त्यामुळे खुर्चीवर बसून प्रवास करणे ज्येष्ठ नागरिक, लहान मुलांची कुटुंबे आणि लांब पल्ल्याच्या प्रवाशांसाठी त्रासदायक ठरते. त्यामुळे या मार्गावर स्वतंत्र स्लीपर वंदे भारत सुरू करण्याची जोरदार मागणी केली जात आहे.
ट्रेन कशी असेल आणि कोणत्या सुविधा मिळतील?
मिळालेल्या माहितीनुसार, नागपूर ते पुणे मार्गावर प्रस्तावित असलेल्या या स्लीपर ट्रेनमध्ये एकूण १६ डबे असण्याची शक्यता आहे. यामध्ये थ्री-टीयर एसी, टू-टीयर एसी आणि फर्स्ट क्लास एसी अशा तीन श्रेणींचा समावेश असू शकतो. आधुनिक आसन व्यवस्था, आरामदायक शयनयान सुविधा आणि ताशी १६० किमीपर्यंतचा वेग यामुळे प्रवाशांचा प्रवास अत्यंत जलद आणि सुखकर होईल.
कोणत्या जिल्ह्यांना फायदा होणार?
सध्याच्या वंदे भारत ट्रेनचे अजनी, वर्धा, बडनेरा, अकोला, शेगाव, भुसावळ, जळगाव, मनमाड आणि दौंड यांसारख्या स्थानकांवर थांबे आहेत. त्यामुळे प्रस्तावित स्लीपर ट्रेन सुरू झाल्यास विदर्भ आणि उत्तर महाराष्ट्रातील अनेक जिल्ह्यांमधील प्रवाशांना पुण्याला जाणे अधिक सुलभ होणार आहे.
स्रोत: मूळ बातमी
Leave a Reply