मुंबई महानगर प्रदेशातील रेल्वे प्रवाशांसाठी एक महत्त्वाची बातमी समोर आली आहे. पनवेल ते वसईदरम्यान थेट लोकल सेवा सुरू करण्याच्या हालचालींना वेग आला आहे. या मार्गासाठी तब्बल १२ हजार ७१० कोटी ८२ लाख रुपयांचा प्रस्ताव केंद्र सरकारकडे पाठवण्यात आला आहे. केंद्र सरकारने या प्रस्तावाला मंजुरी दिल्यास मुंबई महानगर प्रदेशातील रेल्वे प्रवास अधिक सोपा होऊ शकतो.
६९ किलोमीटरचा मार्ग, १७ स्थानके
या रेल्वे मार्गाची लांबी ६९.२३ किलोमीटर असणार असून त्यावर एकूण १७ स्थानके उभारण्याचे नियोजन करण्यात आले आहे. हा प्रकल्प मुंबई नागरी परिवहन प्रकल्पाच्या तिसऱ्या टप्प्यातील ब भागांतर्गत (एमयूटीपी-३बी) राबवण्यात येणार आहे. या मार्गामुळे पनवेल आणि वसई-विरार भागातील प्रवाशांचा दैनंदिन प्रवास थेट जोडला जाणार आहे.
मंजुरीनंतर प्रवास होणार सोपा
सध्या पनवेलहून वसई-विरारला जाण्यासाठी थेट लोकल सेवा उपलब्ध नाही. त्यामुळे या मार्गावर थेट लोकल सुरू झाल्यास हजारो प्रवाशांना मोठा दिलासा मिळेल. प्रस्ताव केंद्राकडे पाठवण्यात आला असून आता मंजुरीच्या प्रतीक्षेत हा प्रकल्प आहे. मंजुरी मिळाल्यानंतर या मार्गाच्या कामाला गती मिळण्याची अपेक्षा आहे.
स्रोत: मूळ बातमी
Leave a Reply