जादुई आवाजाचे देणे लाभलेले गायक मोहम्मद रफी आणि ठाकरे कुटुंबाचा दोस्ताना प्रसिद्ध आहे. मनसे प्रमुख राज ठाकरे यांचे वडील श्रीकांत ठाकरे यांनी संगीतकार म्हणून मराठीत अनेक अवीट गोडीची गाणी दिली आहेत. त्यापैकी एका गाण्यासाठी त्यांनी रफींना विनंती केली. मात्र मराठीतील ‘च’ शब्दाचा उच्चार करताना रफींना अडचणी येऊ लागल्या. त्यानंतर ठाकरे यांनी रफींना मराठी शिकवूनच सोडले, अशी आठवण श्रीकांत ठाकरे यांनी त्यांच्या ‘जसं घडलं तसं’ या पुस्तकात लिहिली आहे.
‘च’चा उच्चार आणि अडचण
गीतकार उमाकांत काणेकर हे ठाण्याहून कधीही बोलवा, ते दादरला हजर असत. ते वरळीच्या सिमेन्स कंपनीत कामाला होते. त्यांनी एक बालगीत आणले होते. त्यात ‘च’ शब्दांचा मारा होता. रफींना ‘च’चा उच्चार काही केल्या जमेना. ‘चा’ म्हणताना दातांना जीभ लावा, असे ठाकरे यांनी रफींना सांगितले. तरीही काही बनत नव्हते. रफींचा मेहुणा जहीरही ते शिकला आणि मला मराठी शिकवा, असे म्हणू लागला. त्याला ठाकरे यांनी सांगितले की तुला नंतर शिकवतो, आधी यांना शिकू दे.
उर्दू शब्दांचा दाखला ठरला उपाय
रेकॉर्डिंग जवळ आले आणि ठाकरे रफींना शिकवत राहिले. अखेर त्यावर उतारा सापडला. जहीन, जरूरत, जरिना, जमानत, जनाना असे अनेक उर्दू शब्दांचे दाखले देऊन त्यात ‘ज’ कसा असतो, तसाच मराठीतील ‘च’चा उच्चार असतो, असे त्यांनी सांगितले. थोडक्यात दुसऱ्याकडून आपली भाषा गाऊन घ्यायची असेल तर दोन्ही भाषांचे ज्ञान हवे, तरच काम होईल, असे ठाकरे यांनी पुस्तकात म्हटले आहे. अखेर हे बालगीत रेकॉर्ड झाले. हे गीत होते ‘प्रकाशातले तारे तुम्ही अंधारावर रुसा, हसा मुलांनो हसा’, जे मराठीतील एक अजरामर बालगीत ठरले आहे. रफींना मराठी गाण्यांचा चस्का लागला होता. ते श्रीकांत ठाकरेंना पुढचे गाणे कधी करायचे, असे विचारायचे. ठाकरे त्यांना थोडे थांबायला सांगायचे, कारण दरवर्षी वेगवेगळ्या कलावंतांकडून गाणी करण्याचे ठरले होते. कधी शोभा गुर्टू, तर कधी निर्मला देवी यांच्यासोबत काम झाले; वंदना विटणकरांना वेळ नव्हता, म्हणून उमाकांत काणेकर यांना सोबत घेतले गेले.
स्रोत: मूळ बातमी
Leave a Reply