विवाह की लिव्ह-इन रिलेशनशिप? सद्गुरूंचे मत

आजच्या आधुनिक काळात लिव्ह-इन रिलेशनशिप अर्थात लग्न न करता एकत्र राहण्याचा पर्याय लोकप्रिय होत आहे. पूर्वी समाजाकडून अशा नात्यांना विरोध केला जात होता. अनेक जोडप्यांना सामाजिक टीकेला सामोरे जावे लागत होते. तर घर भाड्याने मिळण्यातही अडचणी येत होत्या. मात्र, काळानुसार या नात्याला कायदेशीर मान्यता मिळाली असून अनेकजण लग्न न करता त्याऐवजी लिव्ह-इन रिलेशनशिपला पसंती देत आहेत. अशा परिस्थितीत विवाह आणि लिव्ह-इन यापैकी नेमके काय योग्य, असा प्रश्न उपस्थित होत आहे. यावर आध्यात्मिक गुरु सद्गुरू यांनी महत्त्वाचे मत मांडले आहे.

विवाह आणि लिव्ह-इनमधील सर्वात मोठा फरक

सद्गुरू यांच्या मते, लिव्ह-इन रिलेशनशिप ही विवाहापेक्षा चांगली व्यवस्था नाही. विवाह आणि लिव्ह-इन यांच्यातील सर्वात मोठा फरक म्हणजे बांधिलकी. विवाहामध्ये एकमेकांसोबत आयुष्य घालवण्याचे वचन आणि स्थैर्य असते; मात्र लिव्ह-इनमध्ये अनेकदा या बांधिलकीचा अभाव दिसून येतो. दोन व्यक्ती जवळ येत असतील, तर त्यांच्यात प्रेमासोबत परस्पर आदर आणि जबाबदारीची भावनाही असणे गरजेचे आहे. केव्हाही एकत्र राहायचे आणि मन बदलल्यावर वेगळे व्हायचे, अशी मानसिकता असेल तर नात्यातील आदर कमी होऊ शकतो, असे त्यांचे मत आहे.

विवाह ही केवळ सामाजिक परंपरा नाही

विवाहसंस्था निर्माण होण्यामागे कुटुंबव्यवस्था आणि पुढील पिढीचे संगोपन हे महत्त्वाचे उद्देश असल्याचे सद्गुरू सांगतात. कुटुंबातील सदस्यांना स्थिर वातावरण मिळावे आणि मुलांचे पालनपोषण योग्य पद्धतीने व्हावे, यासाठी समाजाने विवाहाला संस्थेचे स्वरूप दिले. त्यांच्या मते, शारीरिक आकर्षण आणि गरजा या आयुष्याच्या एका विशिष्ट टप्प्यावर अधिक प्रभावी असतात. मात्र, वयानुसार त्यांचा प्रभाव कमी होत जातो. तरीही समाजात विवाहाला विशेष महत्त्व दिले जात असल्याने त्याशिवाय आयुष्य अपूर्ण असल्याची भावना काही लोकांमध्ये निर्माण होते.

नात्यांमध्ये वाद होण्याचे खरे कारण काय?

आज अनेक तरुण विवाहाला बंधन समजून त्यापासून दूर राहण्याचा प्रयत्न करतात. लिव्ह-इन रिलेशनशिपला स्वातंत्र्याचा पर्याय मानले जाते. मात्र, सद्गुरू यांच्या मते, नात्यातील अस्थिरता आणि अनिश्चितता व्यक्तीच्या मनात असुरक्षितता निर्माण करू शकते. नात्यांमध्ये होणाऱ्या वादांसाठी केवळ विवाहसंस्था किंवा लिव्ह-इन रिलेशनशिप जबाबदार नसते, तर व्यक्तीची अपरिपक्वता आणि अपुरी समजही त्यामागे कारणीभूत असते.

स्रोत: मूळ बातमी