दिवाळी जवळ येत असताना बाजारात गोडधोड पदार्थांची रेलचेल सुरू झाली आहे. मात्र यंदा मिठाईचे भाव गेल्या वर्षाच्या तुलनेत किलोमागे २०० ते ३०० रुपयांनी वाढल्याने सर्वसामान्य ग्राहकांची खरेदीची गणिते बिघडली आहेत. वाढत्या महागाईत मिठाई कशी घ्यावी, असा प्रश्न अनेकांना पडला आहे. याच काळात जास्त काळ टिकणाऱ्या चॉकलेटकडे ग्राहकांचा कल वाढल्याचे चित्र नवी मुंबईतील बाजारात दिसत आहे.
मिठाईचे सध्याचे भाव
पांढरा पेढा ५०० रुपये किलो, तर केसर आणि मलाई पेढा ६०० रुपये किलो भावाने विकला जात आहे. पिस्ता आणि मलाई बर्फी ६०० रुपये किलो, तर काजू कतरी ८०० रुपये किलो झाली आहे. चोकोबार रोल ६०० रुपये किलो आहे. कलिंगड, स्ट्रॉबेरी, संत्री आणि आंबा अशा फळांच्या आकारातील सुकामेवा मिठाई एक हजार रुपये किलो भावाने मिळत आहे. मोतीचूर आणि चुरमा लाडू ४५० रुपये किलो, खोबऱ्याचे लाडू ५५० रुपये किलो, तर सोनपापडी ४०० रुपये किलो आहे. सुकामेवा मिश्रित खास मिठाईची पाकिटे एक हजार रुपये किलो, तर साखर नसलेली मिठाई ६०० रुपये किलो भावाने बाजारात उपलब्ध आहे.
चॉकलेट गिफ्टची चलती
पूर्वी दिवाळीत घरी बनवलेला फराळ शेजारी आणि नातेवाइकांना देण्याची परंपरा होती. काळानुसार ही परंपरा कमी होत असून, भेटवस्तू देण्याची कॉर्पोरेट पद्धत रुजत आहे. मिठाईपेक्षा चॉकलेट जास्त दिवस टिकते आणि देणे सोपे वाटते, त्यामुळे मित्रपरिवार आणि स्नेहींना चॉकलेट देण्याचा कल झपाट्याने वाढला आहे. नवी मुंबईतील एपीएमसी बाजारात विविध चव आणि रंगांच्या चॉकलेटचे आकर्षक गिफ्ट पॅक खरेदीदारांना भुरळ घालत आहेत. वेगवेगळ्या आकारांच्या खोक्यांमध्ये कागदी किंवा कापडी आवरणात ही चॉकलेट बांधून दिली जात आहेत. चॉकलेटची मागणी लक्षात घेऊन दुकानांमध्येही त्यांचीच रेलचेल दिसत आहे. काही बेकरीवाले घरीच चॉकलेट बनवत असून, महिला बचत गटांच्या माध्यमातूनही चॉकलेट तयार केले जात आहे.
स्रोत: मूळ बातमी
Leave a Reply