सातारा जिल्ह्यात रब्बी हंगाम २०२६ साठी पंतप्रधान पीक विमा योजना राबवण्यास शासनाने मान्यता दिली आहे. नैसर्गिक आपत्तींपासून पिकांचे संरक्षण व्हावे, यासाठी शेतकऱ्यांनी या योजनेत मोठ्या प्रमाणावर सहभागी व्हावे, असे आवाहन जिल्हा अधीक्षक कृषी अधिकारी भाग्यश्री फरांदे यांनी केले आहे.
कोणत्या पिकांचा समावेश?
या योजनेअंतर्गत ज्वारी, गहू, हरभरा, कांदा आणि उन्हाळी भुईमूग या पिकांचा समावेश करण्यात आला आहे. अर्ज करण्याच्या मुदती पिकानुसार वेगवेगळ्या ठेवण्यात आल्या आहेत. ज्वारीसाठी अर्ज करण्याची अंतिम मुदत ३० नोव्हेंबर आहे, तर गहू, हरभरा आणि कांदा या पिकांसाठी १५ डिसेंबरपर्यंत अर्ज करता येणार आहे. उन्हाळी भुईमुगासाठी अर्जाची मुदत ३१ मार्च २०२७ पर्यंत आहे.
योजना कोणासाठी आणि अर्ज कसा करावा?
ही योजना सर्व पात्र, कर्जदार व बिगर कर्जदार शेतकरी तसेच कुळांसाठी पूर्णपणे ऐच्छिक स्वरूपाची आहे. योजनेचा लाभ घेण्यासाठी शेतकऱ्यांकडे ७/१२ उतारा, खाते उतारा, ई-पीक पाहणी नोंद असलेला अद्ययावत ७/१२, फार्मर आयडी क्रमांक, बँक पासबुक आणि अधिकृत फोटो ओळखपत्र असणे आवश्यक आहे. बिगर कर्जदार शेतकऱ्यांना विमा कंपनीच्या संकेतस्थळावरून थेट अथवा वैयक्तिकरीत्या अर्ज सादर करण्याची मुभा देण्यात आली आहे. विहित नमुन्यातील अर्ज बँका व विमा कंपनीकडे उपलब्ध आहेत.
पात्र शेतकऱ्यांनी आपल्या बँक खात्याशी संबंधित राष्ट्रीयकृत किंवा जिल्हा मध्यवर्ती बँक, पोस्ट कार्यालय, विमा प्रतिनिधी, सार्वजनिक सुविधा केंद्र अथवा संकेतस्थळावर मुदतीत विमा हप्ता जमा करावा. योजनेची सविस्तर माहिती व मार्गदर्शनासाठी गावातील कृषी सहायक, मंडळ कृषी अधिकारी किंवा तालुका कृषी अधिकाऱ्यांशी संपर्क साधून शेतकऱ्यांनी वेळेत विमा संरक्षण मिळवावे, असे कृषी विभागातर्फे स्पष्ट करण्यात आले आहे.
स्रोत: मूळ बातमी
Leave a Reply