पुण्यश्लोक अहिल्यादेवी होळकर शेतकरी कर्जमुक्ती योजना २०२६ अंतर्गत कर्जमाफीची चौथी यादी जाहीर झाली आहे. या यादीमुळे जळगाव जिल्ह्यातील सहा हजार ९७६ शेतकऱ्यांना ४५ कोटी ७० लाख रुपयांचा कर्जमुक्तीचा लाभ मिळणार आहे.
शासनाने २ जून २०२६ रोजी शासन निर्णयाद्वारे ही योजना सुरू केली. १ एप्रिल २०१९ ते ३१ मार्च २०२५ या कालावधीत वितरित झालेल्या आणि ३० सप्टेंबर २०२५ पर्यंत थकीत असलेल्या, तसेच ३१ मार्च २०२६ पर्यंत परतफेड न झालेल्या पीककर्ज व पुनर्गठित अथवा फेरपुनर्गठित कर्जासाठी दोन लाख रुपयांपर्यंत कर्जमुक्तीचा लाभ दिला जात आहे.
ऑनलाइन प्रणालीद्वारे अंमलबजावणी
योजनेची अंमलबजावणी ऑनलाइन संगणकीय प्रणालीद्वारे केली जात असून यासाठी शासनाने महाआयटीची नियुक्ती केली आहे. बँकांनी योजना पोर्टलवर थकीत कर्ज खात्यांची माहिती अपलोड केली आहे. महाआयटीने संगणकीय संस्करण केलेल्या माहितीनुसार आतापर्यंत चार याद्यांद्वारे एकूण २५ लाख ८२ हजार ८२७ पात्र लाभार्थी शेतकऱ्यांची यादी आधार प्रमाणीकरणासाठी जाहीर झाली आहे.
आधार प्रमाणीकरण झालेल्या शेतकऱ्यांच्या कर्जखात्यात टप्प्याटप्प्याने कर्जमुक्तीची रक्कम जमा केली जात आहे. चौथ्या यादीसह जळगाव जिल्ह्यातील सहा हजार ९७६ शेतकऱ्यांचा या लाभात समावेश असून त्यांना एकूण ४५ कोटी ७० लाख रुपयांचा दिलासा मिळणार आहे.
स्रोत: मूळ बातमी
Leave a Reply